Бу кюнледе Къарачай-Черкес Республиканы Миллет ишлерини, кёбчюлюк коммуникациялары бла басмасыны хакъындан министерствосу, Черкесскеде кърал филармонияны залында «Главное – вместе» деген ат бла фестиваль бардырды.
Аны ишине бу министерствону, кърал организацияланы, баш окъуу учреждениелени къуллукъчулары, устазла бла сохтала, студентле, атала бла анала, чакъырылгъан къонакъла дагъыда башхала къошулдула. Зал ариу джасалыб, тёгерек къууанчха бёлениб, адамла бир-бири бла ушакъ эте, хапар айта тургъанлай, сахнада той-оюн башланды. Артистле бир кесек тепсегенден, джырлагъандан сора, биринчи сёз Къарачай-Черкесияны миллет ишлерини, кёбчюлюк коммуникациялары бла басмасыны хакъындан министри Мурат Есенеевге берилди. Ол сахнагъа чыкъгъанлай, адетдеча, аны аллына миллет кийимлери бла, джаш эмда къыз келиб, туздам бла айран узатдыла. Ол, гырджындан къабыб, айрандан ичиб, къонакъбайлагъа разылыгъын билдире, алгъыш сёзюн айтды.
Министр джыйылгъанлагъа барына да, уллугъа, гитчеге да, артыкъсыз да студентлеге, быллай ашхы иш бардырыугъа тири къошулгъанлары ючюн бюсюреу этиб, разылыгъын билдирди. Фестивалны быйыл экинчи кере бардыргъанларыны, аны сабийлени, джаш адамланы, уллуланы да джюреклерине джумушакълыкъ, ашхылыкъ, сюймеклик сингдирирге, патриотлукъ бегитирге терен магъанасы болгъаныны юсюнден айтды. Андан сора кесини халкъыны бир къауум адетини юсюнден айтыб, аллай ашхы адетле башха халкълада да болгъанларын билдириб, бурундан бери да ата-бабаларыбыз шохлукъ, къарнашлыкъ джюрютгенлерин, аланы сыйлагъанларын, бегитиб тургъанларын айтды. Мурат Мухарбиевич: «Биз аланы унутуб къоймай, джашау джолубузда тамал этсек, сакъласакъ, халкълыгъыбызны, къраллыгъыбызны, маданиятыбызны, адамлыгъыбызны, сыйыбызны тутарыкъбыз», – деб, фестивалны бардыргъанлагъа, анга къараргъа баргъанлагъа ашхылыкъ, игилик, джетишимле теджеди.
Баш окъуу учреждениеледен, предприятиеледен, организацияладан, башха джерледен келген, тюрлю-тюрлю халкъланы келечилеринден къуралгъан 10 команда 17 теманы юсю бла, ата-бабадан келген шохлукъну, къарнашлыкъны кючюн бегите, тюрлю-тюрлю оюнланы кёргюздюле, айтыуланы билдирдиле, башха билим берген ишле къурадыла. Джашла бла къызла, кеслерини миллетлеринде бурундан келген шохлукъ, къарнашлыкъ байламлылыкъны къатлай, кимни да джюрегин къууанчха ачхан кёб тюрлю зат кёргюздюле, айтдыла. Республиканы халкъларыны маданиятлары, тепсеулери, джырлары, тин, иннет байлыкълары тамал болуб, аланы арасында бирикмекликни кючю къанатларын кенгнге джайды.
Халкъла, адамла башха-башха болгъанлыкъгъа, аланы джууукъ этген, бирикдириб тургъан зат болгъаны, кимни да игилик этерге, сюймекликге, Джуртха кертиликге тартхан кюч болуб тургъаны ачыкъ таныла эди.
Узеирланы Хусей.



