Абыстол (ноябрь) айны 3-ден 12-не дери саулай Эресейде XI-чи кере «Большой этнографический диктант» деген халкъла арасы акция бардырылгъанды. Аны Миллет ишлени хакъындан федерал агентство къурагъанды.

Быйыл «Большой этнографический диктант» деген акция офлайн халда ётгенди. Анга къошулгъанла Эресейни миллетлерини маданиятлары эмда адетлери бла байламлы соруулагъа джууаб бергендиле.
Акциягъа Къарачай-Черкесия да тири къошулгъанды. Бизни республикада алты площадка къуралгъан эди. Ара площадка абыстол айны 3-де Къарачай-Черкес кърал универститетде ачылгъанды.
«Этнография диктантха къошулгъанланы саны джылдан джылгъа ёсюб баргъаны къууандырады. 2025-чи джыл тёрт площадка болгъан эсе, быйыл алты площадка къурагъанбыз. Аны бла да къалмай, диктантны республиканы школларында, джарыкълыкъ юйлеринде да джазгъандыла», – дейди «Большой этнографический диктант» деген халкъла арасы акцияны Къарачай-Черкесияда координатору Къарабашланы Нелля.
Диктантха къошулгъанлагъа сертификатла берилгендиле. Аны эсеблери эндреуюк (декабрь) айны 12-де, РФ-ны Конституциясыны кюнюнде, чыгъарыллыкъдыла.
Акцияны баш мураты – тарих эсибизни сакълау, Эресейни халкъларыны маданиятлары бла адетлерин белгили этиу, миллетле арасы джарашыулукъну бегитиу.

 
{jcomments}