Бу кюнледе Къарачай шахар округну мэри Орусланы Марат кеси излеми бла къуллукъ борчларындан башына бош болгъанды.

Къарачай шахар округну Думасыны 6-чы чакъырыууну депутатлары Орус улуну къуллугъундан чыгъаргъа излегени бла байламлы тилек къагъытын къабыл этгендиле.
Алай бла, 2022-чи джыл аууз-герги айны 26-да Орусланы Маратны мэр къуллукъгъа салыннганы бла байламлы этилген урунуу кесамат быйыл къыркъар (август) айны 6-да болджалы таусулгъунчу кючюн тас этгенди.
Орусланы Магометни джашы Марат Къарачай шахар округга 2022-чи джылдан бери башчылыкъ этиб эди. Мэр къуллукъда ол КГО-ну социал-экономика ёсюмюне уллу юлюш къошхады. Аны башчылыгъы бла талай регионал программа джетишимли толтурулгъанды, ашхы башламчылыкъла хайырландырылгъандыла. Орусланы Марат аскерчилеге, аланы юйдегилерине болушлукъ этиуге да, ёсюб келген тёлюню патриот ангысын бегитиуге да иги эс бёлюб тургъанды.
Энди КГО-ну мэрини къуллукъ борчларын Къушджетерланы Спартак толтурлукъду. Къушджетер улу кёб болмай КГО-ну администрациясыны бегими бла Къарачай шахар округну мэрини биринчи орунбасары къуллукъну толтуруб башлагъан эди.
Ары дери да 12 джыл чакълы бирни Къушджетерланы Асхатны джашы Спартак Къарачай муниципал районну администрациясыны башчысы, андан алда да 10 джылны Огъары Мара элни администрациясыны башчысы къуллукъланы толтургъанды.
Ол, Огъары Мараны, Къарачай районну ёсюмлерине уллу юлюш къошханы, къуллукъ борчларын махтаулу толтургъаны ючюн, тюрлю-тюрлю кърал саугъала бла белгиленнгенди.

 
{jcomments}