Чучхурла Аллах бизге саугъагъа берген джуртубузну байлыгъыдыла. Ала адамны джашауун иги этерге юлюш къошхан аламат затладыла.

Сейирлик Доммайдан Кюнчыкъгъан таба 7 километр барыб, таурухлу Доммай ёлген ёзенни баш джанында, мийиклиги 3758 метр болгъан Гитче Доммай-Ёлген тауну шимал къабыргъасында ариу чучхур секиртмеле къуралгъандыла. 12 метр мийиклиги болгъан къаядан секирген суулагъа Огъары, Тёбен чучхурла дейдиле. Ала экиси да, бир-бирине эришгенча, таууш эте, баш энгишге мыллык атыб, ууакъ, уллу ташладан къуралгъан чауулгъа къуюладыла. Алайда кём-кёк суула, бурула, къайнай, кёмюк этиб, адамны кёзюн алдай, кеслерине тартадыла. Чучхурланы акъ толкъунлары бир-бирин сюре барадыла. Былайда хал бек сейирди. Къыш сууукъда шоркъала таркъаядыла, кюн джылыннган заманда уа чокъуракъ суулары, кюмюшча джылтырай, шоркъулдайдыла. Ала, кюн таякъла бла къучакълашыб ойнай, къаядан чынгайдыла. Сууну тауушу, ариу макъамы талай километр узакълыкъдан эшитиледи.
Ол суула 4046 метр мийиклиги болгъан Доммай-Ёлген тауну къыш да, джай да эримеген бузларындан келиб турадыла. Былайы Кюнбатхан Кавказны эм мийик джерине саналады.
«Русская поляна» деген талагъа джетген адамгъа чучхурла кёрюнедиле. Орус экспедиция XIX-чу ёмюрде былайда туруб, табигъатны тинтгенди, ол заманда атагъандыла алай. Аны биринчи атыуа Джохар талады. Къарачайлыла былайда джохар терекле кёб болгъанлары ючюн атагъандыла. Алайгъа баргъан Доммай Ёлген ёзенни ариулугъуна бёленеди.
Гитче Доммай-Ёлген тау а, тенгизден 3758 метр мийик болгъанлыкъгъа анга чыкъгъан тынчды. Адамла атла бла, квадроциклле бла алайгъа джууукъ барадыла. Асламысына джаяу чыгъыб, чапыракълы эмда ийнели терекледен къуралгъан чегетлеге, кёгетлери болгъан кёкенлеге, табигъатны ариу джасагъан гокка ханслагъа, башлары булутладан ёрге чыкъгъан акъ къанатлы таулагъа къарай, бу сейир джерде заманларын зауукълу ашырадыла.
Доммай-Ёлген ёзенде тенгизден 2000-нге джууукъ метр мийикликде орналгъан чучхурла, адам кёзюн алалмазча, ариудула, кеслери да дармандыла. Алайыны джолу къыйын тюлдю, уллу, гитче да чыгъарыкъды. Ары хычаман (май) айдан къыркъаууз (сентябрь) айны джарымына дери барылса игиди. Ол заманда чучхурла артыкъ да бек ариу кёрюнедиле. Аладан ичиб, таза хауаны солуб, ариулукъгъа къучагъын ачхан адам, анга бир сейир кюч келиб, игилик этерге учунады.

 
{jcomments}