Чапаевское элде къыркъар (август) айны 28-де джылы джетмеген сабий Тойота Ленд Крузер маркалы машинаны тюз джюретелмей, аудургъанды. Ол джол чарпыудан талай джарасы, къыяуу бла Черкесскеде республикан больницаны травматология бёлюмюне тюшгенди. Машинада андан сора да джыллары джетмеген сабийле болгъандыла. Аланы саулукъларына заран джетмегенди.
Багъалы атала бла анала! Машина бла мототранспортну джыллары джетмей джюрютгенлени аталары бла аналары! Шофёр удостоверениеси болмагъанлай машина джюрютюрге болмагъанын эсигизде тутугъуз. Сабийле къоркъуусузлукъ сакълай билмейдиле. Джолда джюрюуню джоругъун билмеген, транспортну джюрютюрге кючю джетмеген кесине, башхагъа да къыйынлыкъ келтирирге боллукъду.
Эресей Федерацияны законуну излемин тутмай, атала бла анала джыллары джетмеген сабийлерине мотор бла джюрюген улоу алыб бередиле. Алай бла, ала кеслерини сабийлерине къоркъуулу болум къурагъанларын эсгермейдиле. Ёсюб келген сабийле скутерни, мопедни, мотоциклни рулюну джанына сюйюб олтургъанлыкъгъа, аланы араларында джолда къалай джюрюрге кереклисин билген бек аз барды. Джолда баргъан сагъатда законну излемине сыйынмагъан тазир тёлеригин да унутадыла. Сабийлерин законнга, джорукъгъа кёре юретмеген атала бла анала, ата-ана борчларын толтурмагъанлары ючюн, административ джууаблылыкъгъа тартыллыкъдыла. Аллайлагъа эсгертиу этиледи неда административ тазир 100-ден – 500 сомгъа дери салынады. Транспортну джюрютюрге эркинлиги болмагъан адамгъа берген а, 30000 сом ачха тёлерикди.
З. Китежев,
Къобан районну ОГИБДД-ны тамадасы
полицияны подполковниги.




