Къарачай-Черкесияны 100-джыллыгъын белгилеуню тамалында 2022-чи джыл къыркъар (август) айны 20-да Черкесскеде толусу бла джангыртылгъан «Нарт» стадион къууанч халда ачылгъан эди. Аны бла байламлы КъЧР-ни Башчысы Темрезланы Рашид «Нарт» профессионал футбол клубну айнытыргъа, аны профессионал футбол лигагъа къошаргъа буйрукъ берген эди. Алай бла, «Нарт» футбол клуб джангыдан къуралыб, эришиулеге къошулуб тебрегенди.
«Нарт» футбол клубха Къоркъмазланы Джагъафарны джашы Алибек башчылыкъ этеди. Ол айтхандан, Къарачай-Черкесияда футболну айнытыугъа республиканы башчылыгъы тыйыншлы эс бёледи, футбол клубда ойнагъанла да атларын махтау бла айтдыргъанлай турадыла.
– Москвадан «Спартак» клубну ветеранларын чакъырыб, Къарачай-Черкесияда футболну айнытыуну къолгъа алгъан эдик. Эм алгъа Эресейни Футбол федерациясы бизни 2-чи лигагъа къошаргъа деген эди. Алай а, джорукъла тюрленедиле да, бизни 3-чю лигагъа къошадыла. Бир айны ичинде футбол ойнарыкъ къауумну къурадыкъ. Аланы кёбюсю бизни республикадан эдиле, къалгъанланы да хоншу регионладан чакъыргъан эдик. Ол джыл огъуна «Нарт» Шимал Кавкавказда экинчи оруннга ие болгъан эди. Бёлек замандан «Кубок Юга России» эришиуледе да хорлагъан эдик. 2023-чю джыл Сочиде бардырылгъан финал эришиуледе бизни команда, усталыгъын танытыб, экинчи орунну алгъан эди. 2024-чю джыл экинчи лигада ойнаб тебрегенбиз. 17 уста команданы арасында 9-чу орунну алгъан эдик. Артда 8-чи оруннга чыкъдыкъ, – деб хапар айтады Къоркъмазланы Алибек.
Алай бла, Къарачай-Черкесияда «Нарт» футбол клуб джангыдан къуралыб, хорламлагъа ие болуб тебрейди. Республикада футболну сюйгенле да аланы ойнагъанларын ашыгъыб сакълайдыла.
– 90-чы джыллада «Нартда» ойнаб тургъан Анзор Гаргаевни чакъырыб, клубну спорт директору этгенбиз. Ол спорт бла байламлы ишлеге джууаблыды. Баш тренерге Дагъыстандан Ахмат Магомедкамиловну чакъыргъанбыз, ол белгили футболистди. Аны бла бирге белгили футболист, премьер-лигада ойнагъан Хасан Мамтовну да тренер штабха къошханбыз, – дейди Къоркъмазланы Алибек. – Республикабызда 20 джылны футбол клуб болмагъанын эсге алсакъ, ишни къурагъан къыйын эди. Алай а бюгюнлюкде ишибиз алгъа барады. Эресейни чемпионатында бизден беш къауум ойнады, аланы ичинде «Нарт 2» команда да барды. Ала бары да бир клубну къурамындадыла. Бизде сабий команда да барды. Клубда тюрлю-тюрлю миллетлени келечилери ойнайдыла, ала бир-бирлери бла шох турадыла, Къарачай-Черкесияны атын да махтау бла айтдырадыла.
Къоркъмаз улу айтхандан, быйыл юч джаш футболист – Хасанланы Руслан, Эмиль Джелкашиев, Темирлан Кадагазов – футбол тюзге биринчи кере чыкъгъандыла. Кеслери да «Нарт 2» командагъа кёчюрюлгендиле. Быйыл футбол клубну къурамы да джангыртылгъанды.
– Клубха Къарачай-Черкесияны футболистлерин алыргъа кюрешебиз. Тышындан келгенле да бардыла. Ала бары да мийик дараджада ойнагъан спортчуладыла. Бизни клубха къошулургъа излегенлени саны да аз тюлдю. Джанкёзланы Ахмат, Владислав Каблахов, Хасанланы Руслан, Эмиль Джелкашиев, Темирлан Кадагазов клубну атын махтау бла айтдырадыла. Къалгъан футболистле да джетишимлери бла къууандырадыла. Быйыл алтынчы оруннга чыгъаргъа кюреширикбиз. Келир джыл а, биринчи оруннга чыгъаргъа мурат этебиз. Къыйын болса да, къарыубузну-кючюбюзню аямай, кюреширикбиз. Бизге таймаздан болушлукъ этиб тургъаны ючюн, республиканы башчылыгъына разылыгъымы билдирирге излейме. Стадионубуз да заманны излемине кёре джарашдырылгъанды, ол Эресейни къыбыла джанында эм игилени бирине саналады. Мындан ары да Къарачай-Черкесияны атын махтау бла айтдырыргъа кюреширикбиз, – дейди Къоркъмазланы Алибек.
САЛПАГЪАРЛАНЫ Умар.




