Ыйых кюн, къыркъаууз (сентябрь) айны 7-де, Черкесскеде Байрамукъланы Халиматны атын джюрютген миллет библиботеканы арбазында «Город мой, ты песня и легенда» деген адабият-музыкалы ингир ётдю. Ол, Черкесск шахарны 200-джыллыкъ байрамына аталыб, къууанч халда бардырылды.
Аны бу библиотека бла С.П. Никулинни атын джюрютген сабий республикан библиотека биргелей къурагъан эдиле.
Джыйылыугъа кёб адам келген эди: КъЧР-ни Правительствосуну келечилери, джазыучула, поэтле, джамагъат бирлешликлени келечилери, республиканы школларыны устазлары бла сохталары, журналистле.
Къууанч ингирни программасы бай эди. Аны Байрамукъланы Халиматны атын джюрютген республикан миллет бибилиотеканы фондларына джууаблы бёлюмню тамадасы Гогуйланы Соня бардырды. Ол, къууанч джыйылыуну хошкелди сёзю бла ачыб, келген къонакълагъа да сёз берди. КъЧР-ни маданият министри Агирбов Зураб, джыйылыугъа келгенлени республиканы ара шахарыны бу джарыкъ байрамы бла алгъышлаб, былай айтды:
– Бизни джуртубуз табигъаты бла бай болгъаныча, фахмулу, чемер адамлары бла да байды. Талай тюрлю миллетни келечилери джашагъаны себебли, барыбыз да бир-бирибизни адетлерин, тин-дин байлыгъын, миллет энчилигин кёргюзген шартларын мийик тута, шохлукъда джашайбыз. Андан сора да таулуну эм уллу шарты къонакъбайлыкъ болгъанын эсден кетермей, халкъла арасы шохлукъну да къаты джюрютебиз. Маданиятда, адабиятда, спортда, аскерчиликде, табышлылыкъ джюрютюуде да джердеш-
лерибиз джуртубуздан тышында да атларын айтдыргъанлай турадыла. Биз бир юйюрча алай джашайбыз десем тюздю. Ол башхалагъа керти юлгюдю. Анга, сёзсюз да, джюрегибиз бек къууанады.
Джыйылыуда КъЧР-ни Джазыучуларыны союзуну правлениесини председатели Байрамкъулланы Наурузгъа да берилди сёз. Ол, Черкесск шахарны 200-джыллыкъ юбилейи бла алгъышлаб, джюрек разылыгъын билдирди. Дагъыда Эресейни Журналистлерини союзуну КъЧР-де бёлюмюню тамадасы Тхагапсов Увжукъ, джазыучу, «Эресейни алтын къаламыны» лауреаты Браткова Татьяна, джазыучу, поэт Магъаяланы (Гапполаны) Аминат, КъЧР-ни халкъ поэти Сидахметова Фарида, «Черкес хэку» газетни баш редактору Абидокова Люсана, «Вестник народов Кавказа» бла «Горянка» газетлени редактору Нартоков Солтан сёлешгенден сора да, Черкесск шахаргъа, Къарачай-Черкесиягъа аталгъан назмуланы да окъудула.
Башында сагъынылгъаныча, республиканы школларындан сохтала да бу джарыкъ байрамгъа атаб назмула окъургъа келген эдиле. Мындан алда эм ариу азбар айтхан сохталаны арасында эришиу баямланнган эди да, бу къууанчда аны эсеблерин да чыгъардыла. Хорлагъан сабийлеге багъалы саугъала бла Махтау къагъытла бердиле. Джыйылыуну аягъында Байрамукъланы Халиматны атын джюрютген библиотеканы тамадасы Хапчаланы Салых, келгенлеге джюрек разылыгъын билдириб, насыб, саулукъ те-
джеди. Келген къонакъланы да къуру къоймады-
ла – бюсюреу къагъытла бла кёб джылланы эсде сакъланырлай саугъала бердиле. Къууанч ингирни джарыкъ джырла бла, той бла тамамладыла.
БАТЧАЛАНЫ Фатима.




