Республиканы ара шахарында кеслери иш ачыб, аны бла кюреширге излегенлеге болушлукъ этерге уллу эс бёлюнеди. Ол зат бла байламлы джылны аллындан бери Черкесскеде 202 социал кесамат этилгенди.

– Кёбюсюне болушлукъ бла табышлылыкъ иш бла кюрешгенле хайырланадыла. Айтыргъа, ала бла 121 кесамат джарашдырылгъанды. Кърал иш къоллу болургъа излегенлеге иги болушады. Аны бла да 58 адам хайырланнганды. Къыйын джашау болумларындан ычхыныргъа излеген 23 адам да къралдан кёлтюргючлюк табханды, – дегенди Черкесскеде мэрияны джамагъатны социал джаны бла къоруулагъан бёлюмюню тамадасы Ольга Прядкина.
Республикан аралыкъда джашагъан Светлана Духанина «азыкъ» бизнесни джолуна турур иннетде кесамат этгенди. Къралдан алгъан 320 минг сомун ол бадражан ёсдюрюуге джоярыкъды. Аланы битдирирге деб ол уллулугъу 240 квадрат метр болгъан теплица ишлегенди.
– Кеси къарыуум бла мен теплица ишлеяллыкъ тюл эдим. Тенгим къралдан болушлукъ алыргъа боллугъун айтады. Мен, керекли къагъытланы барысын да дженгил джыйыб, проектни хазырлаб, ачхагъа ие болдум. Энди ишим аллына барлыгъына да ийнанама, – дегенди Светлана.
Бу тукъум болушлукъ бла бизни республиканы адамлары 2021-чи джылдан бери хайырланадыла. Быйыл Черкесскеде 72 мелиуан сом багъасы 300-ге джууукъ кесамат этер мурат барды.

 
{jcomments}