Къыркъаууз (сентябрь) айны аякъ сюреминде Эресейни Банкы онлайн халда финанс билим бла байламлы къачхы сессияны башларыкъды. Бу дерслеге Къарачай-Черкесияны колледжлерини студентлери бла сохталары къошулургъа боллукъдула. Оюн халда бардырылгъан «Финансланы шахарлары» деген дерследе кёб затдан терен хапарлы болур мадар барды.
Къачхы сессияда беш тюрлю темагъа къараллыкъды. Аланы хар бирине 4-6 дерс бериледи. Алада ачханы къуралгъанындан башлаб, тас этмез ючюн не этерге кереклисине дери айтылады. Аны бла да къалмай, киберпространствону эмда инвестированиени хакъындан да сёз барады. Сёз ючюн, сохтала ачха бла ишлерге юренедиле – оюн халда аманат банкга ачха саладыла, кредитге киредиле, акцияла сатыб аладыла.
Биринчи дерс къыркъаууз айны 18-де эртденбла 9 сагъат бла 30 такъыйкъада башланныкъды. Аны Эресейни Банкыны джууаблы къуллукъчусу Михаил Мамута бардырлыкъды. Дерсни къалай баргъанына къараргъа излегенлени аллай мадарлары боллукъду. Дерсни ким да В Контактеде табаргъа да къолундан келликди. Таб, соруула берирге да боллукъду.
– Эресейни орта усталыкъ билим берген учреждениелерини ичлеринде онлайн халда бардырылгъан бу тукъум дерслеге эм тири къошулгъанланы онусуну ичиндеди бизни республика. Сёз ючюн, джазгъы сессияны эсеблерин чыгъарсакъ, вебинарлагъа къарагъанла 74 кереден аслам болгъандыла. Ол кёргюзюм 2024-чю джыл бла тенглешдирсенг, 55 процентге кёбдю. Дистанцион халда бардырылгъан онлайн-дерслеге Къарачай-Черкесияны бютеу 167 школу бла 13 колледжини барысыны да сохталары къошулгъандыла, – деб чертгенди Эресейни Банкыны джергили бёлюмюню тамадасыны орунбасары Рауф Тугов.
(Бизни корр.).




