Окъуу джыл башланнганы бла бирге Шимал Кавказ кърал академияны дизайн бла лингвистика институтуну тигиучю лабораториясында аскер къаугъагъа къошулгъанлагъа джылы ич кийимле тигиу башланнганды.
Сууукъла тюшгюнчю студентле бла устазла 1000 адамгъа джылы ич кийим тигер муратлыдыла. Кёб турмай 500 кийимни кёзюулю гуманитар джюк бла бирге ашырлыкъдыла.
– «Вузы для фронта» деген саулай Эресейде бардырылгъан акциягъа къошулуб, академия кёб ашхы джумуш этгенин чертерге тыйыншлыды. Сёзден, арт юч джылда академияны коллективи Ата джуртларын къоруулагъанлагъа танг болушлукъ этгенди, – деб хапар айтханды Шимал Кавказ кърал академияны ректору Къочхарланы Руслан.
Ол айтхандан, Ростовда аскер госпиталгъа волонтёрла-медикле 35 джолда бар-
гъандыла, аскер къаугъагъа къошулгъанлагъа эмда Эресейни джангы субъектлерине 60 тоннадан аслам гуманитар джюк джиберилгенди.
250-ден аслам студент бла устаз джаралы аскерчилеге къан эмда сюек джилик да бергендиле. Джангы регионладан 200-ден аслам сохта, уллу класслада окъугъанла, Архызда орналгъан «Нарат» базада солугъандыла.
– Бюгюн къралгъа къыйын кёзюуде барыбыз да къолубуздан келген болушлукъну этерге борчлубуз. Кими госпиталда ишлейди, кими донор болады, кими кийим тигеди. Кими да аскерчилеге къанат берген джылы сёзледен толгъан письмоланы кийимлени ичлерине салады. Бизни болушургъа талпыгъаныбызны джигит аскерчилерибиз сезгенлерине ишек да джокъду. Ол зат алагъа кючкъарыу берсин, – деб къошханды Къочхар улу.




