«ЦЕМРОС» предприятиени болушлугъу бла Джёгетей Аягъы шахарны 2-чи номерли орта школунда заманны излемине келишген физика кабинет ачылгъанды.
Кабинетге тамамлы ремонт этилгенди, ол джангы агъач керекле, интерактив панель, лаборатория оборудование, экзаменлеге хазырланыргъа мадар берген цифра лабораторияла бла баджарылгъанды. Алай бла, сохтала дерследе кеслери опытла этерикдиле, джангы затлагъа юренникдиле. Аны бла да къалмай, кабинетде сохтала цемент производствону, санагъат усталыкъланы, ол джаны бла билим алыуну юсюнден хапарлы болурча стендле салыннгандыла.
«Джангы технологияланы, цемент производствону инженерлерин къурау школдан башланады. Анда уа физика керекди. Узакъ джерлеге барыб айланмай, кесибизде да иш табаргъа боллукъду: Джёгетей Аягъында Эресейни къыбыла джанында эм уллу предприятие ишлейди. Алай бла, профориентация ишни эртдерек башлайбыз», – дегенди «ЦЕМРОС» АО-ну Кавказ филиалыны директору Сергей Богомазов.
Школну директоруну борчларын толтургъан Батдыланы Секинат джангы окъуу кабинет билим бериуню джангы дараджагъа чыгъаргъанын чертгенди, «ЦЕМРОС» АО-гъа разылыгъын билдиргенди.
Окъуу кабинет «ЦЕМРОС» АО толтургъан «Делаем мир лучше!» деген программасыны тамалында ачылгъанды. Проект Джёгетей Аягъы районну администрациясы бла «Кавказцемент» предприятиени арасында 2023-чю джыл джарашдырылгъан кесаматха кёре толтурулгъанды.



