Алийланы Умар атлы Къарачай-Черкес кърал педагогика университетни базасында къуралгъан «Фахму бла джетишим» деген аралыкъ фахмулу сабийлени ачыкълаугъа джораланнганды. Бу аралыкъ экономиканы баш школуну лицейи бла бирге «Эльбрус» деб джайгъы гуманитар-математика школну къурагъанды. Ол университетни Теберди шахарда орналгъан базасыны джериндеди.

Фахмулу сабийлени экономиканы баш школуну устазлары окъутадыла. Сабийлени не джаны бла да фахму джилтинлерин ачыкълар ючюн, устазла къолларындан келгенни барын да этедиле.

- Сохтала сау джылны ичинде алгъан билимлерин бу аралыкъда бегитирге мадар табарыкъдыла. Былайда билимли, фахмулу сабийле, не затха аслам эс бёлюрге излеселе, аны бла кюреширикдиле. Терен билимли устазла алагъа не джаны бла да болушурукъдула, кёб сейир эмда джангы затны айтыргъа боллукъдула, - дегенди аралыкъны келечиси.

Бюгюнлюкде бу школда асламысына Къарачай шахар бла Къарачай районну сабийлери окъуйдула. Алай болса да республиканы башха районлары бла шахарларында джашагъанла келирге излеселе да, алагъа тыйгъыч боллукъ тюлдю.

Бюгюнлюкде былайда 30 сохта окъуйду. Сентябрдан башлаб, «Фахму бла джетишим» деген аралыкъда сабийле билимлерин дистанцион халда ёсдюрюрге боллукъдула.