Къарачай-Черкесияны хурметли джамагъаты!
Эресей Федерацияны Конституциясыны кюню бла барыгъызны да алгъышлайбыз. Эресейчиле 1993-чю джыл алгъан баш закон адамланы джашауларында эркинликлерини, башларына бошлукъларыны, къралны азатлыгъыны, аны бирлигини ышаннгылы къадамасыча орналгъанды. Конституция бизни эркин (праволу) къралыбызны деменгили тамалыды. Къралны ёсюмюню тюз джолун кёргюзеди ол, социал программаланы файдалы хайырландырыргъа, экономиканы бегитирге, Эресейни кёб миллетли, кёб динли халкъын бирикдирирге онг береди.
Бюгюнлюкде бизге бирикмеклик бютюн да бек керекди. Бизни бирлеше билиуюбюз, миллет излемлерибизни джакъларгъа тырмашыуубуз, не тюрлю тыйгъычланы да хорларгъа хазырлыгъыбыз къачан да Ата джуртубузгъа уллу къраллай турургъа болушхандыла. Къарачай-Черкесияны, бютеу къралны да эсенлиги джамагъат ангыбызны (граждан позициябызны) джакълай билгенибизге кёре боллукъду.
Багъалы джердешлерибиз, бу байрам кюнде сизге рахатлыкъ, уллу ашхылыкъ теджейбиз. Джашауугъуз мелхум болсун, насыбдан толсун!
Къарачай-Черкес Республиканы Башчысы
Темрезланы Рашид
Къарачай-Черкес Республиканы Халкъ
Джыйылыууну (Парламентини) Председатели
Иванов Александр
Къарачай-Черкес Республиканы
Правительствосуну Председатели
АРГУНОВ Мурат.
