2022-чи джыл республиканы джамагъатыны эсинде не бла къалгъанды деген сагъатда, эм алгъа Къарачай-Черкесияны 100-джыллыкъ юбилейин белгилегенибиз эсибизге келеди. Юбилейни кърал дараджада белгилеуню юсюнден Указгъа РФ-ны Президенти Владимир Путин къол салгъан эди. Къурау комитетге да РФ-ны маданият министри Ольга Любимова башчылыкъ этгенди.
Юбилейге аталыб республикабызны шахарларында, районларында сау джылны тюрлю-тюрлю кёрмючле, фестивалла, концертле, джармалыкъла, эришиуле дагъыда башха ашхы ишле бардырылгъандыла. Аны бла да къалмай, Къарачай-Черкесияны 100-джыллыгъы къралыбызны ара шахарында да белгиленнгенди. Аланы юслеринден газетибизде джазгъанлай да тургъанбыз. Алай болса да, багъалы окъуучуларыбыз, келе тургъан Джангы джылны аллы бла 2022-чи джылны эсеблерин чыгъара, республиканы юбилейи бла байламлы бардырылгъан бир къауум ишни эсигизге салыргъа излейбиз.
Джигитге сый бериу
Украинада бардырылгъан спецоперацияны кёзюуюнде джигитлик этиб ёлген, «Эресейни Джигити» деген атха тыйыншлы болгъан генерал-майор Боташланы Хусейни джашы Къанаматха атаб республикабызда, аны тышында да эсгертмеле, эсгериу къангала салыннгандыла.
Хычаман (май) айны 16-да Къарачай шахар округну Думасыны депутатлары кенгеш бардырыб, КъЧР-ни Башчысы Темрезланы Рашидни РФ-ны Джигити Боташланы Къанаматны атын Къарачай шахарны ара майданына атаргъа деген оюмун бары да джакълагъан эдиле.
Никкол (июнь) айны 23-де Гитче Къарачай районну Ючкекен элинде орналгъан спорт къалагъа Эресей Федерацияны Джигити генерал-майор Боташланы Къанаматны аты аталгъанды. Спорт къаланы мекямыны къабыргъасына Боташ улуну аты джазылгъан мемориал къанга салыннган эди.
Къыркъар (август) айны 19-да Ленинград областны Гатчина районунда орналгъан «Сиворицы» деген аэродромда РФ-ны Джигити генерал-майор Боташланы Хусейни джашы Къанаматны бюсту салыннганды.
Къыркъаууз (сентябрь) айны 1-де Тёбен Теберди элни орта школуну къабыргъасында Эресей Федерацияны Джигити, Аскер-хауа кючлерини генерал-майору Боташланы Хусейни джашы Къанаматха эсгертме къанга ачылгъанды.
Эндреуюк (декабрь) айны 9-да, Ата джуртну джигитлерини кюнюнде, РФ-ны Джигити, авиацияны генерал-майору, аскер лётчик-снайпер Боташланы Хусейни джашы Къанаматха Черкесскеде эмда Къарачай шахарда эсгертмеле ачылгъандыла.
Автоном область къуралгъан кюн
Башил (январь) айны 12-де, Къарачай-Черкес автоном область къуралгъанына 100 джыл толгъан кюн, республиканы ара шахарында талай мероприятие ётген эди.
Ол кюн КъЧР-ни Башчысы Темрезланы Рашид Черкесск шахарда Хорламны паркына барыб, «Ёмюрлюк Махтауну оту» деген мемориалгъа эмда Совет Аскерчиге аталгъан эсгертмеге гокка хансла салгъан эди.
***
Къарачай-Черкесияны 100-джыллыгъын белгилеуню тамалында 13 юйдегиге Черкесск шахарны шимал джанында орналгъан джангы тийреде фатарладан ачхычла берилген эдиле.
***
Республикагъа 100 джыл толгъан кюн КъЧР-ни Башчысы Темрезланы Рашид тюрлю-тюрлю санагъатлада джетишимли уруннганлагъа да кърал саугъала берген эди.
Темрез улу кърал саугъалагъа тыйыншлы болгъанланы алгъышлай, республиканы 100-джыллыгъы аны Эресейни субъектича къраллыгъын кёргюзген бла къалмай, Къарачай-Черкесияны хорламларыны, джетишимлерини, къыйынлыкъладан сый бла ётгенини белгиси болгъанын чертген эди. Айтыргъа, бютеулей да 28 адамгъа кърал саугъала берилген эдиле.
***
Башил айны 12-де Къарачай-Черкесияны 100-джыллыгъына аталыб Черкесск шахарны Джарыкълыкъ къаласында къууанч джыйылыу да ётген эди. Къууанч джыйылыуну кёзюуюнде республиканы тарихинден, социал-экономика ёсюмюнден, джетишимлеринден хапар айтылгъан эди. Белгили джырчыла, тепсеу ансамблле концерт да кёргюзген эдиле.
***
Ол кюн Къарачай-Черкесияны 100-джыллыгъын «Архыз» курортда да белгилегендиле. Анда байрамгъа атаб «Млечный путь» деген чынды джолну баш станциясындан «Персеиды» деген тау лыжа джол бла 100 лыжачы бирден учуб тюшген эдиле. Архызны тау джолларында лыжалада бирден учуугъа Эресейни джер-джеринден келген туристле да къошулгъан эдиле.
Аны тышында да Архыз посёлокда Къарачай-Черкесияны 100-джыллыкъ юбилейине аталыб «Лик родной республики» деген сурат экспозиция ачылгъан эди. Анга къарагъан адамла республикабызны табигъат байлыгъындан, архитектурасындан, башха махтаулу джерлеринден хапарлы болгъандыла.
Ара шахарда кёрмюч
Башында айтханыбызча, Къарачай-Черкесияны 100-джыллыгъына аталгъан ишле республикадан тышында да бардырылгъандыла. Сёз ючюн, байрым (февраль) айда Москвада, РФ-ны Къоруулау управлениесини миллет аралыгъында, юбилейге багъышланнган кёрмюч ачылгъан эди. Кёрмюч РФ-ны къоруулау министри Сергей Шойгуну башламчылыгъы бла къуралгъан эди.
Кёрмючде «100 лет государственности Карачаево-Черкесии» деген экспозиция къуралгъан эди. Ары келгенле Къарачай-Черкесияда джашагъан миллетлени маданият байлыкълары бла шагъырей болгъан эдиле. Кёрмючге Ата джурт къазауатны заманындан сакъланнган экспонатла да салыннган эдиле.
50 минг конверт
Арттотур (апрель) айны 12-де Эресейни Почтасыны КъЧР-де управлениесини залында Къарачай-Черкес Республиканы 100-джыллыгъына аталыб чыгъарылгъан конвертлени кенг хайырландырыугъа иерча белги (гашение) салыугъа багъышланыб джыйылыу болгъан эди.
Республиканы 100-джыллыгъына аталыб 50 минг экземпляр конверт чыгъарылгъан эди.
Конвертлеге биринчи белги салыргъа КъЧР-ни цифра ёсюмюню министри Валерий Медовый бла Эресейни Почтасыны КъЧР-де управлениесини тамадасы Лайпанланы Ахматха эркинлик берилген эди.
Нарат терекле орнатхандыла
Арттотур (апрель) айны 23-де Къарачай-Черкесияны 100-джыллыгъын белгилеуню тамалында Красногорка стансе бла Сары-Тюз элни араларында бир мийик тюз къабыргъада 3000 нарат терек орнатылгъанды.
Терекле орнатыллыкъ джерге «КъЧР-ге 100 джыл» деб джазыб, тереклени да джазылгъан ызла бла салгъандыла.
Терекле салыргъа келгенлени арасында КъЧР-ни Башчысы Темрезланы Рашид, КъЧР-ни Халкъ Джыйылыууну (Парламентини) депутатлары, КъЧР-ни Правительствосуну къуллукъчулары, тюрлю-тюрлю учреждениелени келечилери, студентле, джамагъат къуллукъчула, айтыргъа, 1000-ден аслам адам бар эди.
Черкесскеге – джангы автобусла
Къарачай-Черкесияны 100-джыллыгъына аталыб Черкесск шахарны автопаркына «Вектор Некст» маркалы 20 джангы автобус къошулгъанды.
Автобусла «ГАЗ» къауумну предприятиелеринде этилген джамагъат транспортну джангы тюрлюсюдюле.
Джангы автобусланы хар бирине 52 адам сыйынады, олтуруб барырча 20 орну барды. Автобуслагъа санларын эркин джюрюталмагъанла да минерча система салыннганды. Ала керекли обрудование бла баджарылгъандыла.
Джаш тёлю хунерликни аралыгъы
Эресейни кюнюне эмда Къарачай-Черкесияны 100-джыллыгъына аталыб Черкесскеде Джаш тёлю хунерликни инновациялы аралыгъы ачылгъан эди.
Джаш тёлю хунерликни инновациялы аралыгъында къуралгъан илму-техника керекле практика ишле, мастер-классла, 3D-прототипирование бла моделированиеден, робототехникадан, программированиеден дерсле бардырыргъа мадар бередиле.
Аралыкъгъа джюрюген сабийле келген къонакълагъа 3D-принтер къалай ишлегенин кёргюзюб, анда Къарачай-Черкесияны 100-джыллыгъыны белгисин чыгъаргъан эдиле.
Къол иш бла кюреширге мадар берген оборудование бла электроинструментле болгъан мастерскойлада сохтала инновациялы техно-проектле къураргъа боллукъдула.
Аралыкъны видеолабораториясына видео, монтаж этген оборудование, аны бла байламлы программала салыннгандыла. Анда джаш адамла кино джарашдырыргъа, режиссёр, звукорежиссёр усталыкълагъа юренирге мадар табхандыла.
Табышлылыкъ бла кюрешиб башлагъан джаш адамлагъа да аралыкъда таблыкъла къуралгъандыла. Аланы бизнес-план джарашдырыргъа, командада ишлерге юретирикдиле, инвесторла табаргъа болушурукъдула. Аралыкъны ючюнчю этажында уа солурча джарашдырылгъан джер орналгъанды.
«…Къарачай-Черкесияда фахмулу сабийле кёбдюле. Ол себебден Джаш тёлю хунерликни инновациялы аралыгъыны иши сабийлени инженер-техника джаны бла хунерликлерин ёсдюрлюгюне ишегим джокъду. Аралыкъны эшиклери сохталагъа, студентлеге, табышлылыкъ бла кюрешген джаш адамлагъа ачыкъ боллукъдула…» - деген эди КъЧР-ни Башчысы Темрезланы Рашид аралыкъ ачылгъан кюн.
«КуНаК-2022» фестиваль
Элия (июль) айны ахыр кюнлеринде Черкесскеде «Джашил айрымкан» деген паркда Кавказны миллетлерини хантлары бла кёбчюлюкню шагъырей этерге джораланнган «КуНаК-2022» деген халкъла арасы фестиваль бардырылгъан эди. Аны КъЧР-ни Туризм бла курортларыны министерствосу Къарачай-Черкесияны 100-джыллыкъ юбилейине атаб къурагъан эди.
Фестивалгъа Азербайджандан, Армениядан, Дагъыстандан, Ингушетиядан, Адыгеядан, Терк Башы Тегейден, Чеченден, Уралдан, Къабарты-Малкъардан, Ставрополь крайдан къонакъла да къошулгъан эдиле. Айтыргъа, миллет хантлагъа устала бла ала биширген ушхууурланы татыуларын кёрюрге излегенлени саны 25 мингнге джете кетген эди.
«Джашил айрымканда» хар регионну келечилери, миллет арбазланы джарашдырыб, алагъа къайтхан къонакъланы кеслерини маданиятлары бла шагъырей эте, татымлы хантла бла сыйлай эдиле.
Фестивалны ал кюнюнде Къарачай-Черкесияны 100-джыллыкъ юбилейине аталыб, къонакълагъа 100 литр окрошка, 100 килограмм палау, 100 литр либжа, 100 килограмм бышлакъ биширген, 100 къарачай-малкъар хычын, 100 литр ногъай шай, къудору, принч, къатдырылгъан гырджынчыкъла къошулгъан 100 литр адыгей шорпа дагъыда башха ушхууурла теджелген эдиле.
Кавказны татымлы миллет хантлары унутулуб къалмасынла деген мурат бла, аланы къалай этилгенлери джазылгъан къагъытны капсулагъа салыб, 50 джылдан джетерик тёлюлеге деб, асырагъандыла. Ол тарих магъаналы джумушну РФ-ны Президентини Шимал Кавказ федерал округда Толу эркинликли келечисини болушчусу Сергей Никитин, КъЧР-ни Правительствосуну Председателини орунбасары Сюйюнчланы Мурат эмда КъЧР-ни туризм бла курортларыны министри Текеланы Расул этген эдиле.
Къарачай-Черкесияны Башчысыны кубогу бла «КуНаК – 2022» деген сыйлы ат ючюн бардырылгъан эришиулеге Эресейни джер-джеринден 10 команда къошулгъан эди.
Эки кюнню баргъан фестиваль аламат концерт программа эмда уллу салют бла тамамланнган эди.
Ара межгит ачылгъанды
Къарачай-Черкесияны 100-джыллыгъын белгилеуню тамалында эндреуюк (декабрь) айны 14-де Черкесскеде республиканы ара межгити ачылгъанды. Ол Шимал Кавказны эм ариу, уллу межгитлерини бириди. Аны ичине бир джолгъа 7 минг адам сыйынныкъды. Арбазын, майданларын да санаб айтсакъ, былайда бир джолгъа 25 минг адам намаз этерча мадар барды. Аны джери 4 минг квадрат метрден асламды.
Къууанчха Къарачай-Черкесияны джамагъаты, Шимал Кавказны регионларындан да кёб адам келген эди.
Ара межгит Черкесск шахарны къыбыла джанында орналгъанды. Анда эркишилеге, тиширыулагъа джораланнган залла бардыла. Арбазда абдез алыучу джерле джарашдырылгъандыла. Межгитни 52 метр мийиклиги болгъан 4 минарети барды. Аны полу мермерден этилгенди, къабыргъалары джашил, кёк бояулудула. Тюрлю-тюрлю мийикликлери, уллулукълары болгъан 33 куполу барды. Ала багъалы ташдан этилгендиле. Ара куполну диаметри 18 метрди. Межгитге 200 терезе ариу тюрсюн бередиле.
Межгитни тёгерегине ариу, деменгили буруу салыннганды. Арбазында скамейкала, фонтан бардыла, аны тёгереги терекле бла джасалгъанды.
«Нарт» стадион
Къарачай-Черкесияны 100-джыллыгъын белгилеуню тамалында къыркъар (август) айны 20-да Черкесскеде толусу бла джангыртылгъан «Нарт» стадион къууанч халда ачылгъан эди.
Стадион ачылгъан кюн республиканы Башчысы 2022-чи джыл «Нарт» деген футбол клубха да 40 джыл толгъаныны юсюнден айтхан эди. Аны бла байламлы Темрез улу «Нарт» деген профессионал футбол клубну айнытыргъа, аны профессионал футбол лигагъа къошаргъа буйрукъ берген эди.
Къууанч джыйылыугъа белгили совет футболист эмда тренер, кёб джылланы «Спартак» команда ючюн ойнагъан Олег Романцев да къошулгъан эди.
Стадионну ачылыууна аталгъан джыйылыуну кёзюуюнде Москвада «Спартак» деген футбол клубну ветеранларыны эмда Къарачай-Черкесияны джыйым командасыны араларында матч ётген эди. Матчны республиканы Башчысы Темрезланы Рашид ачханды: ол тобну уруб, оюн алай бла башланнганды.
Андан сора республиканы артистлери концерт программаларын кёргюзгендиле.
«Нарт» стадионну реконструкциясы «Развитие физической культуры и спорта в Российской Федерации на 2016-2020 годы» деген федерал программаны тамалында бардырылгъанды. Ары бир джолгъа 9025 адам сыйынныкъды. Спорт бла да 380 спортчу кюреширге боллукъду. Стадионда спортну кёб тюрлюсюнден эришиуле, юрениуле бардырыргъа, ГТО-ну берирге да мадар барды.
Дженгил атлетика бла кюрешгенлеге деб 8 чабыучу джолчукъ, узакъ чынгаргъа джараулу сектор ишленнгендиле. Волейбол бла футболну сюйгенлеге площадкала джарашдырылгъандыла.
Москвада концерт
Къыркъар (август) айны 28-де Москвада «Зарядье» паркда «Къарачай-Черкесияны маданият хазнасы» деб Къарачай-Черкесияны 100-джыллыгъына аталгъан концерт ётген эди. Анга 1,5 мингден аслам адам къарагъанды.
КъЧР-ни кърал филармониясы уллу концерт программа хазырлагъан эди. Москваны джамагъаты эмда къонакълары анга къараб, миллет джырла эмда тепсеуле бла зауукъланнгандыла.
Къралыбызны ара шахарында болгъан концертге КъЧР-ни кърал филармониясыны тепсеу театры, джырчыла Акъбайланы Лаура, Любовь Ощепкова, Асият Нурлубаева, Асланбек Хавцев къошулгъан эдиле.
Уллу байрам
Къыркъаууз (сентябрь) айны 6-сы бла 7-де, Къарачай-Черкесияны 100-джыллыкъ юбилейин белгилеуге аталыб, уллу къууанч ишле бардырылгъан эдиле.
Къыркъаууз айны 6-да ингирде Черкесск шахарны ара майданында джаш тёлю бек сюйген артистле Ислам Итляшев бла Султан Лагучевни эмда «5sta Family» деген эресейчи джырлаучу группаны концертлери ётген эди. Ары 8 мингден аслам адам джыйылгъан эди. Къууанч ингир уллу фейерверк бла тамамланнган эди.
***
Къыркъаууз (сентябрь) айны 7-де байрам кенг белгиленнгенди. Республиканы 100-джыллыкъ байрамы бла джамагъатны энчи алгъышларгъа келген къонакъла, Абхазияны Президенти Аслан Бжания бла Къыбыла Тегей Республиканы Президенти Алан Гаглоев, КъЧР-ни Башчысы Темрезланы Рашид бла бирге эртденнгиде Черкесск шахарда Джигитлени аллеясында Ёмюрлюк отха эмда Совет Аскерчилеге аталгъан мемориалгъа гокка хансла салгъан эдиле.
***
Ол кюн КъЧР-ни Башчысы Темрезланы Рашид, Черкесскени Джарыкълыкъ къаласында джыйылыу бардырыб, къууанч халда талай джетишимли джердешибизге кърал саугъала берген эди. Саулай да 28 адам тюрлю-тюрлю дараджалы кърал саугъалагъа тыйыншлы болгъан эдиле.
***
КъЧР-ни Правительствосуну къуллукъчулары Республикан перинатал аралыкъда Къарачай-Черкесияны 100-джыллыгъы белгиленнген кюн туугъан сабийлени аналарын да алгъышлагъан эдиле. Ол кюн 8 сабий туугъан эди.
Джыйылыуда КъЧР-ни саулукъ сакълау министрини орунбасары Кипкеланы Тамара республиканы Башчысы Темрезланы Рашид джиберген алгъышлау къагъытны окъугъанды. Джыйылыуну кёзюуюнде джангы туугъан сабийлени аналарына саугъала бла алгъышлау грамотала берген эдиле.
***
Къарачай-Черкесияны 100-джыллыкъ юбилейин белгилеу байрамгъа РФ-ны Правительствосуну Председателини орунбасары Александр Новак да келген эди. Александр Новак бла КъЧР-ни Башчысы Темрезланы Рашид Черкесск шахарны шимал джанында орналгъан фахмулу сабийлени ачыкълагъан эмда билимлерин ёсдюрген «Спутник» деген аралыкъны ачылыууна аталгъан къууанч джыйылыугъа къошулгъан эдиле.
Къууанчдан сора Темрезланы Рашид бла Александр Новак аны ичине къараб чыкъгъан эдиле. Ол 9500 квадрат метр джерни алады. Анда эркин лабораторияла, окъуу эмда творчество мастерскойла, концерт, тепсеу залла, дерсле бардырыргъа джораланнган кабинетле, спорт залла бардыла.
***
Къыркъаууз айны 7-си «Нарт» стадионда уллу джарыкъ байрам бла тамамланнган эди.
Байрамгъа 18 мингден аслам адам джыйылгъан эди. Къууанчны аллында «На все сто» деген документли фильм кёргюзюлген эди. Аны белгили эресейчи журналист, теле эмда радио бериулени бардырыучу Владимир Шахбаз салгъан эди.
КъЧР-ни Башчысын, джамагъатын да уллу байрам бла РФ-ны Президентини Шимал Кавказ федерал округда Толу эркинликли келечиси Юрий Чайка, РФ-ны Правительствосуну Председателини орунбасары, Шимал Кавказ федерал округга джууаблы куратор Александр Новак, Адыгеяны Башчысы Мурат Кумпилов, Терк Башы Тегей Республиканы Башчысы Сергей Меняйло, Ставрополь крайны губернатору Владимир Владимиров, РФ-ны Федерал Джыйылыууну Федерация Советини членлери, Кърал Думаны депутатлары дагъыда башха сыйлы къонакъла алгъышлагъан эдиле.
Республиканы Башчысы Темрезланы Рашид келген къонакълагъа джюрек разылыгъын билдире, арада байламлылыкъ, шохлукъ мындан ары да тохтамазлыгъын чертген эди.
Къарачай-Черкесияда джашагъанланы Эресейни Джигити, лётчик-космонавт Олег Артемьев, сынаучула-космонавтла Денис Матвеев бла Сергей Корсаков да космосда станциядан КъЧР-ни 100-джыллыгъы бла алгъышлагъан эдиле.
Къууанч ингир хар ким да бек сюйген «Эльбрус» тепсеу ансамблни тепсеую эмда белгили джырчыланы – Ислам Итляшевни, Ренат Джанибековну, Зараны, Стас Михайловну эмда Бастаны – джарыкъ джырлары бла, фейерверк бла тамамланнган эди.
Кремль къалада концерт
Къыркъаууз айны 20-да уа Москвада, Кърал Кремль къаланы уллу залында, Къарачай-Черкесияны, Адыгеяны, Къабарты-Малкъарны 100-джыллыкъ юбилейлерине аталыб уллу концерт ётген эди.
Къууанч джыйылыугъа РФ-ны Президенти Владимир Путин да келген эди. Ол джыйылгъан джамагъатны республикаланы юбилейлери бла джылы алгъышлагъанды.
«Адыгеяны, Къабарты-Малкъарны, Къарачай-Черкесияны халкълары Эресей бла бир кърал болуб, онла бла джылланы ичинде кеслерини бирикмекликлерин, джууаблылыкъларын, патриот сезимлерин танытханлай тургъандыла, бюгюн да алайды.
Адыгеяда, КъМР-де, КъЧР-де джашагъанла къралыбызны бегитиуге, анга ёсюм алдырыугъа уллу юлюшлерин къошхандыла. Сизни джердешлеригиз джигитликлерин, ётгюрлюклерин Уллу Ата джурт къазауатны джылларында да танытхандыла.
Юч республикада да ёмюрледен бери кёб миллетлени, динлени келечилери джашайдыла. Регионал властла бла политика кючле, дин эмда джамагъат бирлешликле оюмларын кескин айтадыла, миллетле арасы шохлукъну бегитиуню, ёмюрледен келген адетлени сакълауну хакъындан кёб иш баджарадыла…» - деген эди РФ-ны Президенти Владимир Путин кесини сёзюнде.
Ызы бла сахнагъа Адыгеяны Башчысы Мурат Кумпилов, Къабарты-Малкъарны Башчысы Казбек Коков, Къарачай-Черкесияны Башчысы Темрезланы Рашид чыкъгъандыла. Ала кеслерини алгъышлау сёзлеринде ётген 100 джыл регионланы ёсюм алгъан заманлары болгъанын, иги кёргюзюмлеге джетгенлерин, адамланы социал болумларын игилендириб кюрешгенлерин чертгендиле.
Концерт программа башланнганында Адыгеяны, Къабарты-Малкъарны, Къарачай-Черкесияны белгили артистлери, тепсеу къауумлары кеслерини чемерликлерин кёргюзгендиле.
Ол кюн Кърал Кремль къаланы фойесинде Къарачай-Черкесияны, Адыгеяны, Къабарты-Малкъарны экспозициялары къуралгъан эди. Анда юч республиканы миллет чыгъармачылыгъыны, санатыны кереклери, миллет кийимлери, юй-турмуш затла теджелген эдиле.
400 марка чыгъарылгъанды
Эндреуюк (декабрь) айны 23-де «Къарачай-Черкесиягъа 100 джыл» деген почта маркала хайырланыугъа берилгендиле.
Къарачай-Черкесияны 100-джыллыгъына аталыб чыгъарылгъан маркаланы хайырландырыугъа иерча белги (гашение) салыугъа аталыб Эресейни Почтасыны КъЧР-де управлениесини залында джыйылыу ётген эди.
Бютеулей да 400 экземпляр марка бла аланы хайырланыугъа берирча конвертле, алагъа белги салырча штемпелле да чыгъарылгъандыла.
САЛПАГЪАРЛАНЫ Умар.
