Бу кюнледе Къыргъызияны биринчи Президенти Аскар Акаев юй бийчеси Майрам бла бизни республикагъа къонакъгъа келгенди.

Къарачай-Черкесияны Башчысы Темрезланы Рашид алагъа хошкелди айтыб, къонакъбайлыкъ этгенди.
Къыргъызияны биринчи Президенти физика-математика илмуланы доктору, МГУ-ну профессору, академиги Аскар Акаев Къарачай-Черкесияны джамагъаты бла, мында джашагъан миллетлени адетлери эмда маданиятлары бла шагъырей болургъа излегенин айтханды.
Къонакъланы Къарачай-Черкесияны махтаулу джерлеринде айланыр, республиканы студентлери бла тюбешиб, алагъан лекцияла окъур муратлары барды.
«Къарачай-Черкесия Къыргъызиягъа керти да къарнаш республикады. Депортацияны заманында бек кёб джердешибиз Къыргъызияны джеринде орналыб, анда джамагъат бла келишиулю джашагъандыла. Анда бек кёб къарачайлы дуниягъа джаратылгъанды. Аланы туугъанларына шагъатлыкъ этген къагъытларында туугъан джерлери Къыргъыз Республика деб джазылгъанды.
Кёчгюнчюлюкден къайтхан адамларыбыз къыргъыз миллетни бек джылы эсге тюшюрюучендиле. Джергили джамагъатны къыйын болумгъа тюшген джердешлерибизге джангы джерде орунлашыргъа болушханын ёмюрде да унутурукъ тюлбюз.
Сизни бизге къонакъ болгъаныгъызгъа къууанабыз. Эки республиканы да араларында къарнашлыкъ байламлылыкъны бегитирге кюреширикбиз.
Тарих тамырыбыз, маданият адетлерибиз, иннетибиз бир болгъанын ангылагъаныбыз бла арада келишиулюкню, шохлукъну ёсдюре, эки республиканы да ёсюмюне сюйюнюрчабыз», - деб, Темрезланы Рашид Аскар Акаев бла аны юй бийчеси Майрамгъа Къарачай-Черкесияны 100-джыллыкъ юбилейине аталыб чыгъарылгъан медалланы бергенди.