Алтотур айны 13-де Къарачай-Черкесияны Башчысы Темрезланы Рашид ишни юсю бла Абаза районнга баргъанды.
Аны кёзюуюнде республиканы Башчысы Псыж элде А.М. Каблахов атлы 1-чи номерли гимназиягъа къарагъанды. Аны биргесине КъЧР-ни Башчысыны эмда Правительствосуну Администрациясыны тамадасы Мурат Озов, Абаза районну администрациясыны башчысы Руслан Кужев да болгъандыла.
Гимназияны директору Сусанна Куршева Темрезланы Рашидге «Молодая гвардия» деген аскер махтауну музейин, спецоперациягъа къошулгъанлагъа аталгъан стендни, сабий башламчылыкъланы аралыгъын, «Точка роста» эмда проектле хазырларгъа джораланнган кабинетлени, спорт залны, хант бёлмени, аны джангы оборудованиесин кёргюзгенди.
«Эм бек «Молодая гвардия» деген аскер махтауну музейин джаратханма. Аны КъЧР-ни махтаулу устазы, фахмулу адам Фаризат Физикова джарашдыргъан эди. Музейде тюрлю-тюрлю джыллада Ата джуртубузну къоруулагъанланы джигитликлерине шагъатлыкъ этген затла сакъланадыла. Школлада джаш тёлюню патриотлукъгъа юретиуге уллу эс бёлюннгени къууандырады», - деб чертгенди Темрезланы Рашид.
Андан сора КъЧР-ни Башчысы сохтала бла ушакъ этгенди, Юйдегини джылына аталгъан проект оюнну сюзюуге къошулгъанды.
«Сабийлени «юйдеги не затды?» деген соруугъа берген терен джууабларын джаратдым. Сохталаны оюмларына мен да хош болгъанма: юйдеги ол сюймекликди, джылыуду, сый бериудю, къартлагъа къайгъырыуду. Бу сабийле бла ушакъ этген да тынч эди», - дегенди Темрезланы Рашид.
Гимназияда ремонт 2021-чи джыл башланнган эди, 2022-чи джыл ремонт ишле бошалгъан эдиле. Окъуу учреждениеге 500-ден аслам сабий джюрюйдю. Уллулугъу 2 минг квадрат метр болгъан, 1955-чи джыл ишленнген мекям бюгюнлюкде заманны излемине толу келишеди. Анда сохтала тыйыншлы билим алырча, фахмуларын ачыкъларча мадарла къуралгъандыла.
«Развитие образования» деген кърал программаны толтурууну тамалында Абаза районда бютеулей да юч школгъа – Псыжда 1-чи номерли гимназиягъа, Элбургъан бла Кубинада школлагъа – ремонт этилгенди.
