Алтотур айны 29-да Къарачай-Черкесияда «Лучший учитель родного языка и родной литературы - 2024» деген Бютеуэресей конкурсну республикан этапыны баш эришиулери ётгендиле.

Бу эришиу ана тил бла адабиятны эм иги устазларыны сынамларын ачыкълар, белгилер, алагъа болушлукъ этер, устазла бир-бирлери бла байламлылыкъ джюрютюрча мадарла къурар мурат бла бардырылады.
Устазла усталыкъларын, сабийлеге ана тилден дерсле бериуде сынамларын кёргюзгендиле.
Алайды да, эришиуню эсеблерине кёре, биринчи оруннга Гитче Къарачай районну Ючкекен элини экинчи номерли орта школуну къарачай тил бла адабиятдан устазы Чотчаланы Мариям тыйыншлы болгъанды. Экинчи оруннга Хабез районну Инжичишхо элини орта школуну черкес тил бла адабиятдан устазы Маргарита Мижаева чыкъгъанды. Черкесск шахарны 19-чу номерли гимназиясыны ногъай тил бла адабиятдан устазы Алтынай Баисова да ючюнчю орунну алгъанды.
«Лучший учитель родного языка и родной литературы» деген Бютеуэресей эришиу бардырыуну бегимине кёре, 2023-чю джыл «Лучшие практики развития родной речи детей дошкольного возраста» деген номинация да къуралгъан эди. Анда Къобан районну Чапаевское элини «Амалька» деген сабий садыны юретиучюсю Хачирланы Марина хорламлы болгъанды.