Республикан аралыкъда «Карачаево-Черкесия в лицах и судьбах» деген сурат кёрмюч ачылгъанды.
Черкесскени Первомай орамында, Сурат галереясыны къатында къуралгъан ол кёрмючню автору Ставропольеде джашагъан белгили суратчы (фотохудожник) Андрей Петрович Смольниковду. Эресейни Картла бла ишлеген суратчыларыны къурамына кирген эмда аллай суратчыланы AFIAP деген халкъла арасы Федерациясыны махтаулу суратчысы болуб тургъан бу хунерли адамны кёб джерледе таныйдыла.
Къарачай-Черкесияны халкъларына аталгъан ол экспозицияда аны 55 карты салыныбды. Бири къалмай джарыкъ, кескин картла, джюрек къылланы къозгъагъан сейирлик чыгъармала. Аланы хар биринде республиканы адамлары – депортацияны сынагъанла, къазауатны ветеранлары, тюз уруннганла, устазла. Хар бири джердешлерибизни юслеринден, аланы джазыуларындан джашау кертиликни кёргюзген энчи хапар айтады.
Андрей Смольников кёрмюч ачылгъан кюн къарагъан адамлагъа кеси экскурсия этдириб чыкъгъан эди. «Хар джол сайын бир чурум чыгъыб, бу кёрмючге болджал салыб тургъан эдим, - деб хапар айтхан эди ол. – Мындан алда бир китабда, «ётген заман ашыкъмайды, ол сакълай биледи» деген сёзлени окъугъан эдим. Аллайын суратларымы, бери чыгъарырны аллы бла сагъышланыб, ол оюмну кертилигине тюшюннген эдим. Сёз ючюн, юч-тёрт джылны мындан алда къурагъан болсам бу кёрмючню, сагъышым, сёзюм да башхаракъ боллукъ эдиле. Нек десегиз, бу суратладагъы адамладан кёбле ол кесек заманны ичине дунияларын ауушдургъандыла. Бу кёрмюч ол адамлагъа сый бериудю. Ала кеслери джашаудан кетгенликге, бу суратлада саулача кёрюнедиле».
КъЧР-ни маданият министри Агирбов Зураб, суратчыны бу ишине багъа бере: «Кёлюбюзню кёлтюрген магъаналы иш этгенди автор. Башха джерледе да аны чыгъармаларын бек джаратадыла къараучула. Картха тюшген адамланы ахлулары бла къалмай, башхаланы, аланы танымагъанланы, билмегенлени да эслеринде къаллыкъдыла ала. Бу картла бусагъатда Эресейни кърал архивинде да эсебде турадыла. Алай эсе, кёб джылланы ала бизни республиканы юсюнден хапар бергенлей турлукъдула», - деб сёлешгенди.
КъЧР-ни Башчысы Темрезланы Рашид соцсетледе кесини официал бетлеринде суратчы Андрей Смольниковгъа бу иши ючюн бюсюреу-сыпас этгенин билдиргенди. «Аны чыгъармалары Къарачай-Черкесияны халкъларыны миллет колоритлерин, энчи шартларын, тау джуртубузну ариулугъун кёргюзген бла къалмай, насыб, къууанч, ашхылыкъ, сюймеклик дегенча шартланы къурагъан сезимлени юслеринден сагъыш этдиредиле.
Бизни Къарачай-Черкесиябызгъа сюймеклиги ючюн, бу фахмулу адамгъа разылыгъымы билдиреме», - деб джазгъанды ол.
