Алийланы Шахарбийни атын джюрютген Къарачай драмтеатр бу джыл башланнганлы талай ишни къолгъа таукел алгъан эди. Аланы бириди «Эртде-эртде бир чегетде» деген спектакль-таурух. Ётген байрым кюн, арттотур айны 12-де, Чапаевское элде аны премьерасы болду. Актёрла ол ишлерин «Къарачай» газетни 100-джыллыгъына багъышлагъан эдиле.
Спектаклге къараргъа келген сабийле элни Джарыкълыкъ юйюню уллу залын толтургъан эдиле. Кёбле ата-аналары, эгечлери, къарнашлары бла бирге олтура эдиле. Школ коридорланы дауурлары бла зынгырдатыучу джашчыкъла бла къызчыкъла - гитче классланы сохталары – таурухну сейир халына бёлениб, шум болуб, кирпик къакъмай къарай эдиле.
Спектаклни автору джаш актёрланы бири Алийланы Фатимады. Пьесаны джазгъан да, режиссёрлукъ этген да кесиди. КъЧР-ни махтаулу артистлери Дотдуланы Энвер, Къоркъмазланы Фатима, джаш актриса Тотуркъулланы Радима, суратчы Бегеуулланы Марат фахмулулукъларын хар къуру да танытханлай турадыла. Бу джол да таурухха къарагъан сабийле къууаннганларын къысха-къысха харс ургъанлары бла кёргюздюле.
Спектакль бошалгъанында театрны директору Гочияланы Руслан анда ойнагъан актёрла бла къараучуланы шагъырей этди. Аны бла бирге сабийлеге, ата-аналагъа, Чапаевское элни школуну устазларына, театргъа къайгъыргъан адамланы барына да разылыгъын билдирди.
Башында сагъыннганыбызча, театр бу ишин «Къарачай» газетни 100-джыллыгъына багъышлагъанын тюз билдирген бла къалмай, редакцияны къуллукъчуларын премьерагъа чакъыргъан эдиле да, бютеу коллектив джыйылыб баргъан эдик. Сахнагъа чыгъарыб бизлеге да сёз бердиле. «Къарачай» газетни баш редактору Къоркъмазланы Салима хар бирибизни къараучулагъа танытыб чыкъгъандан сора, юбилей бла байламлы этиле тургъан, энди этиллик ишледен да къысха хапар айтды. Къобанланы Махмут, Мамчуланы Дина эмда башхала ана тилибизни, ашхы адетлерибизни сакълауда, айнытыуда газетни къаллай магъанасы болгъанындан, тамблагъы кюнюбюз ёсюб келген джаш тёлюню къолунда боллугъундан сёлешдиле. Къоркъмазланы Салима театрны актёрларына газетибизни атындан махтау къагъытла берди.
Театрны директору Гочияланы Руслан айтханнга кёре, «Эртде-эртде бир чегетде» деген таурухну республикабызны эллеринде кёргюзюрюкдюле. Бу айны 23-де теартны сюйгенле аны энтда бир джангы иши бла шагъырей боллукъдула. Малкъар джазыучу Ёлмезланы Мурадинни пьесасына кёре режиссёр Атмырзаланы Магомет салгъан «Шошлукъну чюйреси» деген спектаклни кёргюзюрюкдю.
Ёзденланы Якъуб.
