Россияны Гимни согъулгъандан сора, Президентибиз Владимир Путин ачды фестивалны.
- Кёб къралланы, миллетлени, бирер башха динни тутхан джаш тёлюсюню баш нюзюрю эркинликге, насыбха тырмашыуду, дунияда рахатлыкъны бегитиудю. Адам улугъа эм керекли, эм багъалы бу затла барыгъызны да бирикдириб, бир иннетли этгенине ишегим джокъду. Биз а ол муратларыгъыз толурча болум къурарыкъбыз, ишлерикбиз. Джаш тёлюню фахмусу, къарыуу кючлюдю, дуниягъа джангы фикирле джаяргъа къолундан келеди. Кесигизни келир заманыгъызны къурагъыз. Джашауну иги джанына тюрлендирирге кюрешигиз. Тыйгъычла тюбеселе да хорлай, алгъа барыб турсагъыз, сиз баджармазлыкъ иш джокъду, не да сизни къолугъуздады. Фестиваль сизни шохлукъ, къарнашлыкъ джашау джолугъузда дагъан боллугъу хакъды, - деди Владимир Путин.
Фестивалны ачыуну тамалына саналдыла адам улугъа эм уллу магъаналары болгъан беш тема: экология, билим, энергия, информация, илму.
Къонакъла россиячы эстраданы махтаулу артистлерини концертлерине къарадыла.
Джаш тёлю бла студентлени Бютеудения фестиваллары октябрны 14-ден 22-не дери Сочи бла Москвада боллукъду. Анга 18-35 джыллада къызла бла джашла джыйылгъандыла. Къараргъа, джазаргъа, киногъа, телевидениеге алыргъа келгенлени да айтсакъ, 180 къралдан адамла бардыла.
Темрезланы Рашид анда «ВФМС-2017» деген майданда джаш тёлюню халкъла арасы джангы кёрмючю бла да шагъырей болгъанды. Алайда «Регионы России и мира», «Россия сегодня. Мир будущего», «История и культура», деб экспозицияла къуралгъандыла.
КъЧР-ни Башчысы бизни республикадан экспозициягъа да тыйыншлы магъана бергенди. Аны мындан баргъан джаш тёлю делегация джарашдыргъанды. Темрезланы Рашидни оюмуна кёре, туризм бла этнографияны бу экспозицияны тамалыча кёргюзгенлерин иги этгендиле. Башха къралладан, Россияны башха субъектлеринден адамла да алагъа аслам эс бёледиле. Республиканы Башчысы бизни делегацияны джашлары бла къызларына джетишимле теджегенди. Къонакъла бла танышыб, шох болуб, быйыл 25 джыл толгъан Къарачай-Черкес Республикабыздан аланы хапарлы этерге кереклисин билдиргенди.
