Чарх юсюнде ишлеген медицина комплекс, заманны излемине джууаб этген джангы медицина оборудование бла баджарылыб, республиканы джер-джерине джетиб, адамлагъа танг болушлукъ этеди.
Гитче Къарачай районда, «Саулукъну поезди» деген федерал программаны джашаугъа сингдире, элия (июль) айны 14-ден – 25-не дери чарх юсюнде ишлеген медицина акция ётгенди. Ара район больницаны къуллукъчулары, узакъда орналгъан эллени джокълаб, джамагъатны саулугъун тинтгендиле.
– Айтыргъа, акцияны кёзюуюнде элледе джашагъанладан 435 адам саулугъуна къаратханды. Ол сандан 371 адам кесин кюзгюге салдыргъанды, 324 адам маммография этдиргенди, 390 адам электрокардиографияны ётгенди. Ала барысы да, къан бериб, анализле этдиргендиле, терапевт бла кёз дохтурлагъа кеслерин кёргюзгендиле, – деб билдиргендиле Гитче Къарачай районну ара больницасында.
Бу программаны тамалында узакъда орналгъан элледе джашагъанла, эллеринден чыкъмагъанлай, сынамлы, билимли медиклеге кеслерин кёргюзюрге, саулукъларындан хапар билирге мадар табарыкъдыла. Быллай ишни магъанасы бек уллуду. Сёз ючюн, ауруу джангы орнала башлагъанын ачыкълар амал барды. Алай эсе уа, аны, оздурмай, багъыб башларгъа боллукъду. Тереннге кетмеген аурууну джолун кесген тынчды.
«Саулукъну поезди» федерал программады. Ол миллетни саулугъуна къайгъырыу бла байламлы джаратылгъанды. Къарачай-Черкесияны бютеу районларында аны джашауда орунлу этиуге уллу эс бёлюнеди.




