«В.А. Алмазов атлы миллет медицина тинтиу аралыкъ» федерал кърал бюджет учреждениени усталары Къарачай-Черкесияда кардиология къуллукъгъа уллу багъа бергендиле.

Алайды да, бизни республикагъа Эресейни Саулукъ сакълау министерствосуну делегациясы келгенди. Анга В.А. Алмазов атлы аралыкъны баш директору Евгений Шляхто башчылыкъ этгенди. Ол биргесине кардиология джанындан терен хапарлы болгъан адамланы алыб келгенди.
Делегация Къарачай-Черкес республикан клиника больницада эмда Джёгетей Аягъында ара район больницада бу ишни къалай къуралгъанына, бардырылгъанына да къарагъанды.
– Эки больницада да федерал аралыкъдан келген устала ишге уллу эс бёлюб къарагъандыла. Джюрек аурууладан инджилгенлеге не тукъум болушлукъ этилгени бла шагъырей болгъандыла. Аны кибик терапия, реанимация эмда терк болушлукъну бёлюмлерини ишлери бла да танышхандыла. Стационар болумда ауругъанлагъа къалай къаралгъанына эс бёлгендиле, – деб билдиргендиле КъЧР-ни Саулукъ сакълау министерствосуну пресс-къуллугъунда.
Сёзсюз да, быллай тюбешиулени кёзюуюнде федерал аралыкъдан келген устала джергили врачланы кёб затха да юретедиле.
Москвадан келген делегацияны келечилери Къарачай-Черкесияда кардиология къуллукъ мийик дараджада болгъанын эмда мындан ары да иш джюрютюрге тыйыншлысын чертгендиле.

 
{jcomments}