Эресейни Социал фондуну Къарачай-Черкес бёлюмюню тамалында джыллары келген адамлагъа джораланнган аралыкъла ачыладыла. Ала уллайгъан адамланы джашауларын игилендирирге, заманларын магъаналы эмда зауукълу ашырыргъа, эрикгенлерин кетерирге багъышланнгандыла.

Кёб болмай аллай аралыкъ Хабез районда да ачылгъанды.
Аралыкъда телевизорну, интернетни, компьютерни, спорт инвертарны, шашкаланы, шахматланы, башха стол оюнланы кёрюрге боллукъду. Былайда лекциялагъа тынгыларгъа мадар барды, семинарла ётерикдиле, мастер-классла кёргюзюллюкдюле, адамлагъа финанс эмда цифралы санагъатладан дерсле берилликдиле. Аны юсюне да къол иш бла кюреширге сюйгенлеге, китаб окъургъа излегенлеге да ол мадар теджелликди.
– «Кюмюш» джылгъа келгенлеге не къадар да таб болур ючюн кюрешебиз. Ала аралыкъда кёз ачарыкъларын, сюйген ишлери бла кюрешириклерин бек излейбиз. Ким биледи, ары дери белгили болмай тургъан фахму джилтинлерин тышына чыгъарлыкъла да болурла. Келсинле, заманларын джарыкъ ашырсынла, солусунла, турмуш джашауда хайырландырыргъа боллукъ затлагъа да юренсинле, – дегенди КъЧР-де Социал фондну тамадасы Аслан Озов.
Алайды, джангы ачылгъан джылы келгенлени аралыгъы эшиклерин ачханды. Аны адреси былайды: Хабез район, Хабез эл, Советская орам, 21-чи юй.

 
{jcomments}