Къралны Башчысы Владимир Путинни аманаты бла, бютеу Эресейдеча, Къарачай-Черкесияда да газ алкъын джетмеген джерлеге аны тартыу таукел джюрюш бла барады.
Алайды, энчи юйле, социал магъаналы объектле газ бла тынгылы баджарыладыла. Сёзден, арт джети айны ичинде 664 адамны тюз юйюню къатында газ келиб тохтагъанды – ала аны ючюн сом да тёлемегендиле.

Бютеулей да 800 юйге газ тартылгъанды, аланы ичлеринде 2024-чю джыл тилек къагъытларын берген адамла да бардыла. Быйыл джылны аллындан бери адамла джашагъан юйлени къатларына тогъуз километр газ быргъы тартылгъанды.
Социал магъаналы объектледен тилек къагъытла тюшгендиле, газ тартылыргъа керекли объектлени ичлеринде медицина эмда окъуу-билим берген учреждениеле да бардыла. Аны кибик, 13 аллай объектни тюз къатларына дери газ быргъыла баргъанларын да чертерге дурусду. Кеслерине башчылыкъ этген джергили органла алагъа газ тартдырыуну къайгъысын этедиле.
Газ бла баджарылыу тыйыншлы дараджада болур ючюн, 2025-чи джылны аллындан бери газны кереклисича юлешген юч пункт ишленнгенди.
Белгилисича, газ бла баджарылыргъа излеб, тилек къагъыт джазгъанланы тюз юйлерини къатларына дери газны кърал хакъсыз элтеди. Таблыкъла бла хайырланыргъа тыйыншлы къауумлагъа газ оборудованиени алыргъа кърал ачха болушлукъ да этеди.

 
{jcomments}