Тёбен Новгородда джаш тёлюню бютеудуния фестивалыны слётуна хазырланыу барады. Ол къыркъаууз (сентябрь) айны 17-ден 21-не дери ётерикди. Эресейни Президенти Владимир Путинни аманаты бла джарашдырылгъан «Джаш тёлю эмда сабийле» деген миллет проектни тамалында бардырыллыкъды ол.
Бу уллу магъанасы болгъан ишге къошулургъа излеб, 175 къралдан эмда Эресейни 89 регионундан 62 мингден аслам адамдан тилек къагъыт тюшгенди.
Къарачай-Черкесиядан да беш тири эмда фахмулу джаш адам слётха къатышырыкъды. Сайлау этиб, джаш тёлюню бютеудуния джыйылыууна эм тыйыншлыла теджелгендиле. Ала окъуу-билим, маданият, илму, волонтёрлукъ эмда джаш тёлю политика бла байламлы адамладыла.
Бу слёт баш фестивалгъа хазырланыуда уллу атламды – ол 2026-чы джыл боллукъду.
Ары Эресейни джер-джеринден эмда тыш къралладан джаш адамланы эм игилери, эм онглулары келликдиле: башчылыкъ эте билгенле, джамагъат ишледе юлгю болгъанла, тюрлю-тюрлю санагъатлада атларын айтдыргъанла.
Слётну программасында кёб сейир зат боллукъду: дискуссияла, мастер-классла, проектлени сюзюу, маданият мероприятиеле, сынам бла алмашыныу дагъыда башхала.
– Слётха бизни республиканы джаш адамлары да къошуллукъдула. Ол зат джаш тёлюню фахмулу, тири болгъанын, къралыбызны джарыкъ тамбласы ючюн къарыуун, билимин аямай кюреширигин кёргюзеди, – деб джазгъанды КъЧР-ни Башчысы Темрез улу.




