Бу кюнледе «Бирикген Эресей» партияны регионал бёлюмюню Джамагъатха кёлтюргючлюк этген штабында «Служу Отечеству» деген бютеу Эресей акцияны тамалында джыйылыу болду. Анда власть органланы къуллукъчулары, джамагъат бирлешликлени келечилери аскер къаугъагъа къошулгъанла бла аланы юйдегилерине болушлукъ этиуню юсюнден сёлешдиле.

«Защитники Отечества» деген кърал фондну Къарачай-Черкесияда бёлюмюню тамадасы Абазалыланы Марат СВО-ну ветеранларына, ёлген аскерчилени юйдегилерине фонд къалай болушханыны юсюнден толу хапар айтды.
«Ата джуртубузну къоруулагъан аскерчиле, аланы юйдегилери алагъа джораланнган болушлукъ мадарла бла заманында эмда толусу бла хайырланырча этерге кюрешебиз. Ол ишлени баджарыр ючюн, бизни фонд республикан власть органла эмда джамагъат бирлешликле бла къысха байламлылыкъ джюрютеди. Республиканы шахарлары бла районларында фондну социал координаторлары ишлейдиле. Ала аскерчилени, аланы юйдегилерини кереклилерине къарайдыла, тюрлю-тюрлю органла бла байламлылыкъ тутуб, джумушларын баджарыргъа болушадыла. Айтыргъа, аланы тилеклерине, джарсыуларына тыйыншлысыча къаралады», – деди Абазалыланы Марат.
КъЧР-ни урунуу бла социал ёсюмюню министри Хачирланы Кемал да регионал дараджада СВО-ну ветеранларына къаллай болушлукъ этилгенини юсюнден айтды.
«Аскер къаугъагъа къошулгъанлагъа кёлтюргючлюк этиу бла байламлы бизни республикада 44 социал болушлукъ мадар барды. Республикада «Помощь участикам СВО и членам их семей» деген сервис ишлеб тебрегенди. Аскерчиле бла аланы юйдегилери, джукъгъа барыб айланмагъанлай, ол сервис бла хайырланыб, керекли джумушларын тындырыргъа боллукъдула. Ол сервисни юсю бла тилек къагъыт берилсе, министерствогъа тюшеди. Биз да, тилек къагъытда нени юсюнден джазылгъанына къараб, аны керекли ведомстволагъа джиберебиз. Андан сора да, республиканы шахарларында, районларында аскерчилени юйдегилери бла тюбешгенлей турабыз. Ол тюбешиуледе министерствону къуллукъчулары, «Защитники Отечества» фондну келечилери, джергили администрацияланы башчылары аскерчилени юйдегилерине болушлукъ мадарланы юслеринден хапар айтадыла, соруулагъа джууаб бередиле. КъЧР-ни Башчысы Темрезланы Рашид да СВО-гъа къошулгъанлагъа, аланы юйдегилерине уллу эс бёлюнюрге кереклисин айтханлай турады. Башчыны айтханын таймаздан толтурургъа, бу джууаблы ишни андан да деменгили баджарыргъа кюреширикбиз», – деди Хачирланы Кемал.
«Бирикген Эресей» партияны толтуруучу комитетини тамадасыны орунбасары, КъЧР-ни Халкъ Джыйылыууну (Парламентини) депутаты Фатима Карданова да сёлешди. Ол аскер къаугъа башланнганлы партия къаллай ишле баджаргъаныны юсюнден толу хапар айтды. Ол айтхандан, политика партияланы келечилери гуманитар болушлукъ ашыргъанлай, тюрлю-тюрлю сууаблыкъ акцияла бардыргъанлай турадыла.
«Знание» деген эресейчи джамагъат бирлешликни КъЧР-де бёлюмюню тамадасы Болатланы Артур да СВО-гъа къошулгъанланы юйдегилери бла тюбешиуле бардырыуну, болушлукъ мадарланы юсюнден хапар айтыуну магъанасын чертди.
Джыйылыуну ахырында республикан СМИ-лени журналистлери соруула бериб, алагъа тынгылы джууабла табхандыла.

Салпагъарланы Умар.

 
{jcomments}