Къарачай районну Джангы Къарачай посёлогунда кёбчюлюкню спортха, саулукълу джашаугъа кёллендирир мурат бла саулай Эресейде бардырылгъан «Земля спорта» деген марафонуну муниципал кёзюую ётгенди.
Бу ишни КъЧР-ни Эл мюлк министерствосу, КъЧР-ни Физкультура бла спорт министерствосу кёлтюргючлюк этиб, Къарачай районну спорт школуну директору Теуналаны Таукъан къурагъанды.
«Земля спорта» деген марафонуну баш мураты элледе джашагъан адамланы спорт бла кюреширге кёллендириудю. Анга къарт, джаш да къошулурча этилгенди.
Марафонну программасына кёре армрестлингден, дженгил атлетикадан (400, 1000 метрге чабыу), къол таш атыудан эришиуле бардырылгъандыла. Хорламлы болгъанла медалла, дипломла бла саугъаланнгандыла.
Айтыргъа, «Земля спорта» деген марафон шахарланы тышында джашагъанлагъа деб къуралгъан федерал дараджалы проектди. Ол тюрлю-тюрлю джылгъы адамлагъа эришиулеге къошулуб, тириликлерин кёргюзюр мадар береди.
Салпагъарланы У.




