Элия (июль) айны 2-де, Волгодонск шахарда Социалист Урунууну Джигити Алексей Улесовну эсгериуге аталыб, боксдан саулай Эресейде эришиуле болгъандыла. Ол эришиуледе Къарачай-Черкесиядан эки боксёр хорлаб, медалла алыб къайтхандыла.
Бархозланы Азнаур 86 килограмм ауурлукъда хорлаб, алтын медаль алгъанды. Алакъайланы Амин 57 килограмм ауурлукъда джез медалгъа тыйыншлы болгъанды. Джетишимли спортчуланы ол эришиулеге белгили юретиучюле Шамель Гоншоков, Али Дзамыхов, Каппушланы Азамат хазырлагъандыла.
Бу эришиулеге Эресейни 30 регионундан, джыллары 19-дан 40-гъа дериле болуб, 100 спортчу къошулгъанды. Алайда хорлагъанлагъа 13 тюрлю саугъа болгъанды. Быйыл 43-чю кере бардырылгъан бу турнирге биринчи кере бютеу Эресей дараджа бергендиле.
Къошуб айтыргъа тыйыншлыды, Къарачай-Черкес Республиканы спортчулары, быйыл элия (июль) айда тюрлю-тюрлю дараджада бардырылгъан эришиуледе хорлаб, 11 медаль алгъандыла. Аланы 6-сы алтындыла. Спортчуларыбыз мындан ары да джангы мийик джетишимлеге ие болур муратлыдыла.
Узеирланы Хусей.




