Къарачай-Черкес Республиканы Башчысы Темрезланы Рашидни башламчылыгъы бла ана тил бла адабиятдан дерслени санын аз этмез мадарла изленедиле. Аны магъанасы уллуду, маданият хазна бла тил байлыкъны сакълауда ол ара ёзеклени бириди.
– Ана тил бла адабиятдан дерслени санын ёсдюрюу сабийлени маданиятыбызны, ёмюрлени теренинден келген адетлерибизни тарихине сингдириудю, аланы керекли билим бла сауутландырыуду. Ёсюб келген тёлюлени алларында тин-иннет хазнабызны эшиклерин ачыуду, – дегенди КъЧР-ни окъуу бла илму министри Инна Кравченко.
Ана тил бла адабиятны устазлары да оюмларын таукел айтадыла:
«Ана тил бла адабиятны окъуу, сынгар билим алыу болуб къалмай, миллетни хауасын, ич дуниясын да билиудю. Биз, сабийлерибиз ана тиллерин билир ючюн, къолубуздан келгенни барысын да этерикбиз».
Эресей Федерацияны Билим бериу министерствосу билдиргеннге кёре, къралны бютеу школларында ана тил бла адабиятдан дерсле берилгенлей турлукъдула (Эресейни халкъларыны тиллеринде). Аны бла бирге, 1-чи классда 2025-чи джылны къыркъаууз (сентябрь) айындан башлаб, дерс бериуню джоругъу тюрленеди – Роспотребнадзорну излеми бла бир сагъатны дерсден тышында окъурукъдула, сабийлеге таб заманда. Ол бегимни юсюнден Эресейни бютеу регионларына билдиргендиле.
Мындан ары да Эресейни Билим бериу министерствосу ана тиллени (Эресейни халкъларыны тиллерин) окъутууну джолундан джанларыкъ тюлдю. Аны бла бирге окъуу китабланы чыгъарыуну, устазланы билимлерин ёсдюрюуню да кёз туурада тутарыкъды.




