Къобан районда Кавказ. РФ-ны болушлугъу бла «Джангы терек бачха» деб инвестицион проект джашаугъа таукел сингдирилиб тебрегенди. Бу ишге башламчылыкъ этген «Мичуринский» элчи-фермер мюлк быйыл уллу битим алыр муратлыды.

200 гектар джерни алгъан терек бачха 2023-чю джыл биринчи кере кёгет бергенди – юч минг тонна алма джыйылгъанды. Былтыр эл мюлкчюле былайдан беш минг тоннадан аслам битим джыйгъандыла. 2025-чи джылны къыркъар-къыркъаууз (август-сентябрь) айларында эки къатха кёб алма алыргъа боллугъуна ышандырадыла.
– Джангы технологияны кючю бла битим алыу ёсгенди. Терекле бир-бирлерине джууукъ салыннгандыла. Сёз ючюн, 200-400 терекни орнуна 1500-5000 терек орнатылгъанды. Ол терекле алашаладыла, аланы «кючлери» бутакъларына тюл, кёгетлерине барады.
Дженгил кёгет берген бу терек бачхада ишни кёбюсю къол бла этилмейди, минерал ашау тамчы халда сугъарыу (капельное орошение) бла бериледи, – деб хапар айтхандыла «Мичуринский» мюлкде.
Терек бачханы аякъ юсюне салыр ючюн, 1,3 миллиард сом джоюм этилгенди. 800 мелиуан сомдан асламысы Кавказ. РФ-ды. Тереклени 2021-чи джыл орнатыб тебрегендиле. Бюгюнлюкде ол тамам джарашыб бошагъанды – кесини гёзени да барды. Анда кёб тюрлю алма битеди, аланы кёбюсюне «Магнит» эмда «Пятёрочка» тюкенледе табаргъа боллукъду.

 
{jcomments}