Республиканы Къан къуюучу станциясына джергили бюджетден заманны излемине джууаб этген джангы, мийик технология дараджалы оборудование алыб берилгенди. «ГЕМОТЕРМ– ZSA» – алайды аны аты.
– Бу джангы оборудование асыулу къан продукт хазырларгъа мадар береди. Ары дери да бар эди эски аппаратыбыз, ёзге ол бюгюннгю излемге толу джууаб эталмай эди, аны себебли джангы ашхы оборудование амалсыз керек болуб тура эди, – дегенди Къан къуюучу станцияны баш врачыны борчларын толтургъан Башкаланы Мурат.
Ол чертгеннге кёре, джангы дженгил бузлатыучу «ГЕМОТЕРМ– ZSA» плазмасы болгъан 18 контейнерни бузлатырыкъды. Ол станцияны бу тукъум джумушун толусу бла асыулу баджарлыкъды.
– Къанны -45-ден -50 градус температурагъа дери бузлатыргъа тыйыншлыды. Ол заманда плазманы джараусуз болмагъанлай иги сакълар мадар барды. Ол зат ауругъанлагъа, къан кереклилеге болушлукъ табдырыуну джолун кенгертеди, – дегенди станцияны къуллукъчусу Анжелика Бархиева.
Республикан къан къуюучу станцияны баш врачыны борчларын толтургъан Башкаланы Мурат Къарачай-Черкесияны джамагъатын къан берирге, аны бла адамланы джанларын къалдырыргъа чакъырады.
Бюгюн-бюгече хайырландырылмагъан къан, деменгили сакъланыб, келир заманда кимге болса да джарарыгъына, аны джашаууна себеб болуруна ишек джокъду. Джангы салыннган оборудование ол мадарны береди.




