Къарачай-Черкесияда эл мюлкде уруннган адамла быйыл фермер мюлклерин кенгертирге къралдан болушлукъ табарыкъдыла.

2019-чу джылдан бери «Агростартап» программаны тамалында регионда джангы иш къураб башлагъан 540 фермерге болушлукъ этилгенди. Аны бла байламлы КъЧР-ни районларында 570-ден аслам джангы иш орун ачылгъанды. Элчилени кёбюсю грантланы сютню эмда малны кёб этер иннет бла алады. Аны юсюнден КъЧР-ни Башчысы Темрезланы Рашид кесини социал сетлеринде джазгъанды. Ол айтханнга кёре, эл мюлкню айнытыу бизни республикада баш джумушланы бириди.
– Къралны Президенти белгилеген нюзюр – 2030-чу джылгъа производствону объёмун 25 процентге ёсдюрюу. Быйыл эл мюлкде уруннганлагъа федерал эмда джергили бюджетден 1 миллиард сомгъа джууукъ ачха берликбиз. Ол ачхагъа адамла мюрзеу ёсдюрлюкдюле, тахта кёгетни аслам этерикдиле, джерни сугъарлыкъдыла, малны айнытырыкъдыла, терек бачхала саллыкъдыла, элде туризмге джол берликдиле. Бютюн да аслам эс терек бачхаланы, мюрзеуню, тахта кёгетни, шекер чюгюндюрню ёсдюрюуге, джерни сугъарыугъа бёлюннюкдю, – деб джазгъанды регионну Башчысы Темрезланы Рашид.

 
{jcomments}