«Россети Шимал Кавказ» компанияны Къарачай-Черкес филиалыны усталары 2025-чи джылны джети айында 690 хайырланыучугъа элетрокъууат барырча этгендиле. Аны барысын да бир-бирине къошсанг, кючю 17,2 МВТ-гъа джетеди.
Джангы объектлеге ток барыр ючюн, энергетикле тюрлю-тюрлю напряжениелери болгъан 23,9 километр линия тартхандыла эмда 1,2 МВА кючю болгъан беш джангы (10/0,4 кВ) трансформатор подстанция ишлегендиле. Аны бла да къалмай, электрокъууатны эсеблеген 426 приборну джангыдан джарашдыргъандыла.
Тартылгъан токну кёбюсю адамланы энчи юйлерине баргъанды. Аны тышында да бизнес бла кюрешген гитче эмда орта предприятиеле да «тагъылгъандыла» анга.
Ток бла баджарылгъан объектлени ичлеринде эл мюлк санагъатны предприятиелери да джетишедиле. Сёзден, башил-никкол (январь-июнь) айлада 14 мюлкге ток тартылгъанды. Бютеулей да алагъа 3,2 МВт кюч джиберилгенди.
Социал магъаналы объектлеге да джол тутханды электрокъууат. Аланы арасында Эркин-Халкъ элде Джарыкълыкъ юй, Пригородное элде спорт школ, Ючкекенде къол телефон байламлылыкъны станциясы бардыла.
Энергетикле алагъа тюшген тилек къагъытлагъа автомат системаланы кючю бла къарагъанларын да чертерге тыйыншлыды. Ол зат ишни дженгиллетирге эмда аны къалай баргъанына кёз-къулакъ болургъа мадар береди.




