Шимал Кавказ кърал академия «Фермерни школу» деген окъуу-билим берген проектге къошулургъа излегенлени чакъырады.
Бу проект ишлеб башлагъанлы беш джыл болады. Ол кёзюуню ичине бу проект фермер ишни аякъ юсюне салыргъа кёблеге себеблик этгенди. Быйыл да бу иш академияда бардырыллыкъды. Айхай да, анга Эресей Федерацияны Эл мюлк министерствосу, КъЧР-ни Правительствосу, джергили АККОР, регионну алчы фермер мюлклери болушлукъ этерикдиле. Алайды да, юч айны ичине бу проектге къошулгъанла кёб затдан хапарлы боллукъдула: кеслерини эркинликлерин, финанс джорукъланы, фермер мюлклени ишлерин, маркетингни тамалларын, джангы агротехника джорукъланы билликдиле, регионну айтылыб тургъан агропредприятиелеринде практикаларын бардырлыкъдыла.
– Проектге къошулгъанланы академияны устазлары, аланы ичлеринде кёб профессор барды, не джаны бла да кёб затха юретирикдиле. Алгъан билимлери джараб, ала кеслерини мюлклерин айнытырыкъларына бир тукъум бир ишек джокъду, – дегенди Шимал Кавказ кърал академияны ректору Къочхарланы Руслан.
2025-чи джыл проектге къошулгъанла асламысына билимлерин атчылыкъны эмда терек бачхаланы юслери бла ёсдюрюрге мадар табарыкъдыла.
Бютюн да аскер къаугъагъа къошулгъанлагъа эмда аланы юйдегилерине кенг джол берилликди – ала, проектге къошулур ючюн, экзамен берлик тюлдюле эмда алагъа джораланнган таблыкъла бла да хайырланныкъдыла.




