Мындан алда Эресей гвардияны къуллукъчулары «Каникулы с Росгвардией» деген акцияны тамалында Теберди курортда сабий лагерде сабийлеге эртденнги зарядка этдиргендиле.

Эресейгвардиячыла сабийле бла таза хауада тюбешиб, аланы таукелликге, тириликге ачхан, саулукъларын бегитирге себеб болгъан талай упражнение этдиргендиле. Тюбешиуню кёзюуюнде эресейгвардиячыла сабийлеге къоркъуусузлукъну техникасын кёргюзюуге, санланы тюз къалай ийлерге кереклисине бютюн да бек эс бёлгендиле.
Полицияны майору Айбазланы Тимур, быллай ишни джаш тёлюню ариу халиге юретирге терен магъанасы болгъанын чертгенди.
«Биз сабийлени джюреклерине ашхылыкъгъа, игиликге саулукълу джашау къураргъа, джууаблылыкъгъа сюймеклик сингдирирге излейбиз. Эртденнги зарядка адамлагъа халларын джарыкъ этиб, тирилик бергенден сора да, ала бир-бири бла сёлешиб, арада шохлукъ бегирча мадарла къурайды», – дегенди абычар Айбазланы Тимур.
Эресей гвардияны къуллукъчулары, зарядка бошалгъандан сора, сабийлеге кеслерини къуллукъларыны юсюнден хапар айтыб, аманлыкъчыланы тутаргъа деб ишленнген машина бла шагъырей этгендиле. Сабийле талай затха сейирсиниб, эс ийиб къарагъандан сора, эресейгвардиячыланы кийимлерин кийиб кёргендиле.
Шохлукъ халда къуралгъан бу тюбешиуню ахырында, сабийле, уллула да, Эресей гвардияны къуллукъчуларына быллай магъаналы ишле бардыргъанлары ючюн, разы болгъанларын билдиргендиле.

 
{jcomments}