Къыркъар (август) айны 22-си Эресей Федерацияны Кърал байрагъыны кюнюдю. Бизни кърал ол кюнню 1993-чю джылдан бери белгилейди.
Байракъ шохлукъну, къарнашлыкъны, бирикмекликни, эркин, рахат джашауну, хорламны, джууаблылыкъны, тюзлюкню белгисиди. Биз джыл сайын РФ-ны Кърал байрагъыны кюнюн белгилей, уллу къралыбыз бла ёхтемленебиз, аны джетишимлерине къууанабыз. Уллу Эресейни адамлары болгъаныбыз бла махтанабыз.
Эресей бу арт отуз джылны ичинде юч бояулу байракъ бла джашайды.
Анда акъ – тазалыкъны, рахатлыкъны учунууну кёргюзеди.
Кёк – тюзлюкню, кертиликни, тюз иннетлиликни, ышанмакълыкъны, джарашыулукъну танытады.
Къызыл – батырлыкъны, ётгюрлюкню, таукелликни, джигитликни, ишде тириликни билдиреди.
Биз къралыбызны, аны кърал белгилерин сыйлайбыз, ол сыйны сакъларгъа сабийлеге да аманат этебиз. Арт джыллада ёсюб келген джаш тёлюню патриотлукъгъа юретиуге терен эс бёлюнеди. Ол барыбызны да къууандырады.
Эресей Федерацияны Кърал байрагъыны кюню, кеси эркинлиги бла джашагъан бирикген къралны адамлары болгъаныбызны эсибизге салады, тёлюден тёлюге кёче, Джуртха кертиликни кючюн бегитирге патриот сезимлерибизни ёсдюрюрге себеб болады. Къралыбызны байрагъыны мийикде джашнаб турууу, бизни эркин джашарыгъыбызны кючюдю, тутуругъуду, тамалыды.
Биз аны сейир тарихи бла ёхтемленебиз. Эресейни Кърал байрагъыны кюню бла уллу къралыбызны джамагъатын алгъышлайбыз, анга узакъ ёмюр рахат, мамыр, мелхум джашау теджейбиз!
УЗЕИРЛАНЫ Хусеин.




