Уллу Ата джурт къазауат башланнганлай кëб джашыбыз къазауатха кетгендиле, тиширыуларыбыз да къарыуларын аямай,  алагъа болушуб тургъандыла. Уллу Ата джурт къазауатны кëрген, бизге да толу хапар айталлыкъ къарт адамла, ай медет, аз болуб барадыла.

Алай а къралыбыз да, республикабыз да ол къыйын заманланы джаш тëлю эсде тутарча, къарт адамланы, джигитлени сыйларын кëрюрча кëб тюрлю мадар къурайдыла. Китаблада, газетледе къазауатны юсюнден хапарла басмаланадыла. Алийланы Умар атлы Къарачай-Черкес кърал университетде конференциялада бизни республикада джашагъан хар миллетни джигитлерине уллу эс бëлюнеди, ол бары да ëсюб келген тëлю тарихин билир ючюн, джигитлерин таныр ючюн этиледи.  Биз билмеген джигитлик этиб ëлген джашларыбыз, къызларыбыз да кëб болгъандыла.
Бу статьяда мен Эриккенланы Залихатны ëтгюрлюгюню юсюнден джазаргъа излейме. Бу тиширыуну юсюнден мен биринчи кере тогъузунчу классда устазымдан эшитгенме. Мени бла бирге окъугъанла да сейир болуб, эс ийиб аны хапарана тынгылагъан эдиле. Эриккенланы Бийболатны къызы Залихат 1913-чю джыл Учкулан элде туугъанды. Уллу Ата джурт къазауат башланганлай, Залихат гитче къызчыгъын да анасына аманат этиб, партизан отряд бла бирге къазауат этгенди.  Залихат акъыллы, билимли, тири тиширыу болгъаны себебли, аны оноугъа къошуб тургъандыла. Пулемëтдан уста ата билген Залихат Архыз ëзенде «Эдельвейс» фашист отрядны тыйыб, къызыл аскерчилеге ызларына къайтыргъа къойгъанды. Фашистлени къолларына тюшгенинде уа тиширыуну чырт джазыкъсынмайын, базыкъ темир чыбыкъла бла Нарсана шахарда тюйюб инджитиб тургъандыла. Алай а Залихатны сындыралмагъандыла, тюзлюкню джанында болгъан къарачай къыз тахсаны бермегенди. Джукъ эталмагъанларында, Залихатны башха партизанла бла бирге, шкок бла уруб ëлтюргендиле.
Аны залимлигини, Джуртуна сюймеклигини юсюнден Байрамукъланы Халимат «Залихат» деген китабында джазгъанды. Залихатны этген джигитлиги къуру Къарачайда белгили тюлдю. 2022-чи джыл Къарачай-Черкес университетде орус джазыучу Лев Филиппович Ильин бла тюбешиу болгъан эди. Ол тюбешиуде Ильин Къарачай-Черкес Республиканы 100-джыллыгъына атаб джазгъан «Горная роза» деген китабын кëргюзгенди. Бу китабда Эриккенланы Залихатны этген джигитлигине уллу эс бëлюнеди.
Залихатча Ата джуртларын сюйген, туугъан джерлерин джауладан къоруулаб сермешген, биз тынч джашар ючюн джанларын берген джигитлерибизни эсде тутаргъа борчлубуз, алагъа сый берирге керекбиз.

Аджиланы Разима.

 
{jcomments}