«Билими болгъан адам джер джюзюню иесиди», – деб джазгъанды банкчы Ротшильд Натан Майер.
Бу сёзлени магъанасын, эринчек адам болмаса, барыбыз да ангылайбыз, деб келеди кёлюме.
ХХ-чы ёмюрню орта сюреминде башланнган, бу арт джыллада уа артыкъ да бек къызыу баргъан глобализация ишле къралланы, миллетлени да джашау джолларын иги кесек тюрлендиргендиле. Интернет, соцсети дегенча затла бу арт он-онбеш джылны ичинде джерни юсюнде джашагъан адамлагъа кёб магъаналы затны юсюнден хапарла бередиле.
Къарачай-малкъар (алан) миллетибиз да бусагъатда джерни юсюнде бола тургъан тюрлениулеге кёре ишин, джашау джолун кереклисича бардырыргъа керекди.
Бир-эки джылны мындан алгъа «Къарачай-малкъар тукъумла эмда аланы келечилери» деб WhatsApp къауум къуралгъанды. Анда экиджюзден асламыракъ адам барды: тукъум тамадала, устазла, джазыучула, суратчыла, эл мюлкде ишлегенле. Къауумну къуралгъаныны баш магъанасы – тин-дин байлыгъыбызны сакълау, адеб-намыс, ишленмеклик, адамлыкъ дегенча сёзлени мийик дараджада кереклисича тутаргъа кёллендириу, миллетибизни иги шартларын сакълау, ашхы адетлерибизни не къадар сабийлеге сингдириб кюрешиу. Аны тышында, тарихибизни, тин хазнабызны тинтиу, къарачай-малкъар (алан) миллетибизни керти уланларыны, къызларыны атларын ачыкълау дегенча ишле этиледиле. Айтыргъа, «Карачаево-балкарские фамилии: люди, события, факты» деб, китаб джазыла турады, Аллах айтса, кёб турмай, басмагъа хазыр боллукъду.
Бу къауум къуралгъанлы аз заман кетсе да, бир талай джетишимли, адамны джюреги къууанырча ишле да этилгендиле. Сёз ючюн, къауумну къурагъан тарихчи Орусланы Сеит-Батдалны джашы Казбек «Кисловодск» деген аты болгъан китаб джазгъанды. Бу китабны бусагъатда джашагъан, энди келлик тёлюлеге да магъанасы бек уллуду. Китабда Нарсана шахарны тарихи Къарачай-Малкъар бла, алан миллетибиз бла, байламлы болгъаны ачыкъ кёргюзюледи.
Къауумчуланы кёбюсю кеслери разылыкълары бла ай сайын ачхачыкъ джыйышдырыб, Къарачайда, Малкъарда болсун, миллетибизге уллу къыйыны кирген, бирем-башха дегенча устазларыбызгъа, иги окъугъан, спорт бла кюрешген сабийлерибизге саугъала да этедиле.
Багъалы къарнашла, эгечле! Миллетибизде этиллик ишле бир да кёбдюле. Биз бусагъатда, биригиб, кюрешиб, не къадар деменгили тамал къурасакъ, тамблабыз ол къадар ышаннгылы боллукъду; къаллай джашау сокъмакъ салалсакъ, ёсюб келген джаш тёлюбюз тамбласында ол джолда барлыкъды.
Аллах айтса, ким болгъаныбызны унутмай, Минги Тауубузну акъ къарлы башларын къаралтмай, Ата джуртубузну сакълаялсакъ, джерни юсюнден тас болмазбыз!
Сыйлы, алан миллетим! Аллахдан сеннге кёб насыб, игиликле тилейме.
Ижаланы Осман,
тарихчи, шахмат оюнну тренери, философия илмуланы кандидаты.




