«Кърал миллет политиканы джашауда бардырыу» деген программаны ышыгъы бла быйыл никкол (июнь) айны 12-ден аууз-герги (октябрь) айны 12-не дери «Русская цивилизация» деген IX-чу халкъла арасы сурат конкурс баямланнганды.
Бу эришиуге картха тюшюрюуню усталары (профессиональные фотографы) эмда ол ишни сюйген адамла къошулургъа боладыла. Къайсы бирини да джылы 18-ден аз болмазгъа керекди.
Миллет ишлени хакъындан федерал агентство бардыргъан бу конкурсха джыл сайын да кёб адам къошулуучанды. Сёз ючюн, 2024-чю джыл анга 18786 карт джиберилгенди. РФ-ны субъектлери бла къалмай, бютеу дунияны суратчыларын бирикдирген бу иш джылдан джылгъа кенгден кенг джайылыб барады.
Конкурсха джиберилген картлагъа ашыкъмай къараб, сюзюб, жюри эм иги суратланы сайларыкъды, эсеблерин чыгъарыб, Халкъ бирликни кюнюн байрамларны аллы бла, хорлагъанлагъа ёчле, саугъала берилликдиле.
Уллу конкурслада ёчле, саугъала алыб, атларын айтдыргъан усталадан, лауреатладан, маданиятны махтаулу къуллукъчуларындан, суратчыладан, актёрладан, фотожурналистледен къуралгъан жюри, чыкны тайдырмай, хар бирине тыйыншлы багъа берликди.
Бу эришиуге кёбчюлюкню къошар иннетде санагъат интернет-ресурслада эмда регионал СМИ-де тамамлы хапар берилгенди. Анга Къарачай-Черкесияны келечилери да тири къошулурла деб ышанабыз.
Конкурсну юсюнден толу хапарны аны официал сайтында www.rucivilization.ru кёрюрге боллукъду.
(Бизни корр.).




