Къыркъар (август) айны 22-де РФ-ны Кърал байрагъыны кюню Къарачай-Черкесияда да къууанч халда белгиленнгенди.

Кърал байракъны кюнюне аталгъан патриот ишле республиканы шахарлары бла районларыны барында да ётгендиле. Алагъа сабийле, уллула да сюйюб къошулгъандыла.
Джер-джерде къууанч джыйылыула Кърал байракъны кёлтюрюу бла 14 джыл толгъан джаш адамлагъа паспортла бериуден башланнгандыла.
Черкесск шахарны ара майданында «Флаг России» деген флешмоб бардырылгъанды. Аны кёзюуюнде школланы сохталары 60-метрлик байракъны джайгъандыла, тепсеген да этгендиле. Ол акциягъа Къарачай шахарда джашагъанла да къошулгъандыла. Шахарчыла Боташланы Къанаматны атын джюрютген ара майданнга Кърал байракъны элтгендиле.
Аны бла бирге республикада автопробег бардырылгъанды. Ол Къарачай-Черкесияда джюреклери патриот сезимледен толгъанланы бирикдиргенди.
«Окна России», «Символ народа», «Россия в цвете» деген акцияла да фахмулу адамлагъа Ата джуртларына сюймекликлерин кёргюзюр мадар бергендиле. Юйлени, окъуу учреждениелени терезелерин байрамгъа аталгъан оюула, суратла бла джасагъандыла, байракъны бояуларыча шарланы кёкге ийгендиле.
Къарачай-Черкесияны предприятиелери да байрамгъа тири къошулгъандыла. Сёз ючюн, «РусГидро» ПАО-ну Къарачай-Черкесияда бёлюмюнде ишлегенле, патриот митинг бардырыб, Кърал байракъны кёлтюргендиле, автопробег да бардыргъандыла.
Кърал байракъны кюнюне аталгъан къууанч ишле Черкесск шахарны джыр, тепсеу къауумларыны концерти бла тамамланнганды. Алай бла, республикада джашагъанла энтда бир кере бирикмекликлерин, Ата джуртха сюймекликлерин, Эресейни кърал белгилерине сый бергенлерин танытхандыла.

САЛПАГЪАРЛАНЫ Умар.

 
{jcomments}