КъЧР-ни Премьер-министри Мурат Аргунов республиканы билим бериу санагъатыны 2025-чи – 2026-чы окъуу джылгъа хазырлыгъын ачыкълаугъа аталгъан уллу кенгеш бардыргъанды.

Анга Правительствону къуллукъчулары, шахар эмда район администрацияланы башчылары, билим бериуге джууаблы ведомстволаны тамадалары, джорукъ сакълаучу органланы келечилери къошулгъандыла.
Кенгешни ача, Мурат Аргунов, эм алгъа окъуу учреждениеледе къоркъуусузлукъну бегитир мадарлагъа эс бёлюрге кереклисин чертгенди.
«Санитар излемлеге келишген мекямлада спорт эмда джыйылыула бардырыулыучу залла, окъуу кереклери бла классла хазыр болургъа, аланы от тюшгенден да, терроризмден да къоркъуусузлукълары иги бегирге керекди», – дегенди Премьер-министр.
Ол айтхандан, адетдеча, Билимни кюнюнде республиканы бютеу школларында да къууанч джыйылыула бардырыллыкъдыла. Биринчи классха барлыкъ 5000 сабийге биринчи къонгурау къагъыллыкъды. Джангы окъуу джыл сохталагъа билим берирге 5118 устаз хазырды.
Кенгешде КъЧР-ни окъуу бла илму министри Инна Кравченко регионну билим бериу бла кюрешген 327 кърал эмда муниципал организациясында тинтиуле бардырылгъанларын, ала окъуу джылгъа хазыр болгъанларын айтды.
Роспотребнадзорну бизни республикада управлениесини тамадасы Сергей Бескакотов да окъуу учреждениелени эпидемиология джаны бла къоркъуусуз болгъанларын, сохталаны арасында ауруула джайылмазча профилактика ишле бардырлгъанларын, хант юйлеге айырылыб эс бёлюннгенин чертди.
Эресей гвардияны КъЧР-де управлениесини тамадасыны орунбасары полицияны полковниги Сергей Багданов бла КъЧР-де полицияны тамадасыны орунбасарыны къуллукъ борчларын толтургъан Тохчукъланы Шамиль да джыйылгъанланы къоркъуусузлукъну бегитир мурат бла этилген ишледен хапарлы этдиле. Ала Билимни кюнюнде, къууанч джыйылыула чарпыусуз ётер ючюн, къошакъ мадарла этилликлерин да айтдыла.
КъЧР-ни саулукъ сакълау министрини орунбасары Кипкеланы Тамара да школлада медицина кабинетле дарман-дары бла баджарылыб, хазыр этилгенлерин чертди. Миллет орузламагъа кёре сохталагъа прививкала этилиб барлыкъларын да къошду ол.
Эресейни МЧС-ни КъЧР-де Баш управлениесини тамадасыны орунбасары Сергей Кравченко, къоркъуу болса, кёбчюлюкню сагъайтырыкъ системаланы юслеринден хапар берди.
Муниципал окъуу учреждениелени 2025-чи – 2026-чы окъуу джылгъа хазырлыкъларыны юсюнден шахар, район администрацияланы башчылары докладла этдиле. Ала сохтала школлагъа автобусла бла барлыкъларын, алагъа джылы ушхууурла бериллигин да сагъындыла.
Барына да тынгылагъандан сора Мурат Аргунов джууаблы къуллукъчулагъа белгиленнген ишлени тыйыншлысыча баджарыргъа, джангы окъуу джылны мийик дараджада ётдюрюрге борч салды.

 
{jcomments}