Къыркъар (август) айны 29-да, Аскер медицина къуллукъчуну кюнюне атаб, Халкъ фронт СВО-да бизни аскерчилени джашауларын къутхаргъан акъ халатлы джигитлеге саугъала берди.

Ол ишге чакъырылгъанланы арасында Халкъ фронтну КъЧР-де регионал штабына башчылыкъ этгенлени бири Тлябичева Изабелла, регионал штабны къурамындагъыла – Гочияланы Борис, Клычев Руслан, Струговцев Денис, Чесноков Олег, Горбулёв Вадим – дагъыда башхала бар эдиле.
СВО-да, къыйын болумда, кеслерини орунларында усталыкъ, джигерлик, джигитлик танытыб, борчларын сый бла толтургъан 8 адам саугъаланды.
Алайгъа джыйылгъанла айтхандан, аскер медицина къуллукъчуланы, аланы усталыкъларыны байрамлары бла саугъалау, Эресейни бютеу джамагъаты алагъа бюсюреу этгенин, сыйлагъанын билдиреди. Аскер медицина къуллукъчула, уруш баргъан джерледе джигитлик таныта, алагъа салыннган джууаблы борчну толтура, джанларын-къанларын аямай кюрешгенлери белгилиди. Аланы хар бири, кесини джашаууна къоркъуу бола тургъанлай, джаралы болгъан аскерчилеге биринчи болушлукъ табдырыб, кече-кюн кюрешиб тургъанларыны юсюнден айтдыла.
Саугъаланнганланы арасында КъЧР-ни махтаулу врачы, медицина къуллукъну отставкадагъы подполковниги Сергей Переверзев, Къубран посёлокда ишлеген психиатрия клиниканы социал координатору Тохчукъланы Асият, Гитче Къарачай районну ара больницасыны баш врачы Джатдоланы Ислам дагъыда башхала бар эдиле.
Саугъаланы Черкесскеде Багъыу-реабилитацион аралыкъны баш врачы Темрезланы Бориспий бла Халкъ фронтну КъЧР-де исполкомуну тамадасы Каппушланы Людмила бердиле.

Узеирланы Хусей.

 
{jcomments}