Къарачай тиширыула джигит да, джигер да болгъанлары хакъды. Ала, эркишини къанатлары болуб, аны таукеллигине, тирилигине кюч къоша, юйде сабийлеге къарай, юйюрню тыбыр джылыуун сууутмай джашайдыла. Аллай сейир тиширыуланы бири эди 12 сабийни анасы Батчаланы Рамазанны къызы Къагъыйланы Люба.

Ол 1936-чы джыл Къумуш элде Рамазанны урунууну багъалатхан, халкъны ашхы адетлерин тутуб джашагъан юйдегисинде туугъанды. Гитче къызчыкъ адамлары бла кёчгюнчюлюкню заманында Къыргъызстанны Фрунзе областыны «Чалдовар» колхозуна тюшеди. Алайда 4-джыллыкъ школну бошаб, сабийлигинден огъуна къыйын ишледе ишлеб башлайды. Арадан талай джыл озуб, сейир чырайы бла кимни да кёзюн алдагъан, субай санлы ариу къыз Къагъыйланы Апасны джашы Азрет-Алий бла джазыуун бир этеди. 1955-чи джыл джаш юйдегиге улан тууады. Аны атына Ханбий атайдыла. Кёчюрюлген халкълагъа Джуртларына къайтыргъа эркинлик берилгенинде, Рамазанны юйдегиси 1957-чи джыл халкъ бла бирге Кавказгъа къайтыб, Сары-Тюз элде орналады. Сюйюмлю ышара, огъурлу ана бу ашхы элде джашайды. Ол, эл мюлк ишлеге къошула, юй джумушун да эте, кёб иш баджарады. Былайда Азрет-Алий бла Любагъа 11 сабий тууады. Джигит ата бла ана, аланы барын да адебни-намысны тёрюнде ариу халиге юретиб, билим алдырыб, джашауну айланч-буйланч джолларында абынмай барырча этгендиле. Азрет-Алий да, он джылындан башлаб, тюрлю-тюрлю ишледе джигерлик танытыб, халал уруннганды. Совхозда бригадир болуб тургъанды. Тутхан ишине тири джюрюш бере, эл мюлкню айныууна энчи юлюш къошады. Аны джигер уруннганына шагъатлыкъ этедиле кърал саугъалары да. Ол «Урунууну ветераны» медаль бла да саугъаланнганды.
Юйюрню къызлары бла джашларыны бары да Сары-Тюз элни орта школун джетишимли бошагъандыла. Тамада джашлары Ханбий Къарачай-Черкес кърал университетни, Пятигорскеде сатыу-алыу, юристле хазырлагъан институтну да тауусханды. Ол уллу къуллукълада ишлеб тургъанды. Халимат Семенладады, тыйыншлы ишледе уруннганды, бусагъатда юйдеди. Батырбий Черкесскеде медучилищени, Пятигорскеде политехника институтну ашарыкъ бёлюмюн бошагъанды. Таулу джаш, усталыгъыны юсю бла деменгили ишлей, атын сый бла айтдыргъанды. Зульета Айбазладады, бухгалтер къуллукъну баджарады. Кертибий Къарачай-Черкес кърал университетни физкультура факультетин бошагъанды. Шахарбий, Астраханда милицияны школун бошаб, юристлик институтну да тауусханды. Сапарбий да юристлик институтда окъугъанды. Ала, МВД-ны органларында джетишимли ишлей, атларын иги бла айтдыргъандыла. Фатима кулинар училищени бошагъанды. Аиданы, Зульфияны да бухгалтер билимлери барды. Джандарбий Къарачай-Черкес кърал университетни бошагъанды. Муратбий да ол университетни тауусханды. Была, къалгъанла да республиканы тюрлю-тюрлю санагъатларында атларын иги бла айтдырыб урунадыла.
Ашхы ананы, аллай бир сабийни асыраб, аланы тыйыншлы адамла этиб ёсдюрюр ючюн, ненча джукъусуз кечеси, тынгысыз кюню ётген болур! Ол, баш иеси Азрет-Алий бла бирге, балаларын адебни-намысны, халкъны ашхы адетлерини джолунда ариу халиге юретгенди. Ала экиси да, Уллу Аллахха махтаула бере, Андан тилекле тилей, сейирлик дуниягъа алгъыш эте, джашай эдиле. Эки огъурлу адам, бир-бирине билек болуб, игиликни, ашхылыкъны тамалында кече-кюн демей, кюрешгендиле. Ауушхандыла, Аллахны рахматында болсунла.
Джигерлиги, огъурлулугъу ючюн, хурметли ананы «Джигит ана» деген алтын джулдуз, талай медаль кёкюрегин джасай эди.
Адамлыкъны, ишленмекликни, терен къайгъырыуну нёгер этиб джашагъан, Любача, керти тиширыуларыбызны адамла унутмайдыла, аны разылыкъ бла эсгередиле.

Лепшокъланы Хусеин.

 
{jcomments}