Джаш тёлюню ариу халиге юретиуде, тюз иннетге кёллендириуде, сёзсюз да, джазыучула бла назмучуланы юлюшлери уллуду. Аланы чыгъармалары адебни-намысны сакъларгъа, адамлыкъ шартланы джакъларгъа чакъырадыла. Айтыргъа, окъуучугъа устазлыкъ этедиле.
Къарачай маданиятха юлюш къошхан фахмулу джазыучуларыбыз эмда поэтлерибиз кëб болгъандыла. Халкъ аланы джырларын джырлаб, хапарларын, назмуларын, азбар этиб, сый бериб тургъанды. Поэтлерибизни чыгъармаларында кëбюсюне къралыбызны тарихи, Ата джуртха, табигъатха сюймеклик суратланады.
Акъбайланы Азретни назмуларында да бу темалагъа уллу эс бëлюнеди. Аны бла къалмай, поэт чыгъармаларында ашхы муратларын, терен сагъышларын ачыкълайды. Поэтни мен сюйген чыгъармаларына сиз да эс бëлюрсюз деген мурат бла джазама.
Акъбайланы Алийни джашы Азрет туугъан элини юсюнден кëб джазгъанды. «Джазгъы шахарым – Теберди», «Тау этегинде – гокка хансчыгъым...» дегенча назмуларында туугъан джерин багъалатады, ахлуларына сюймеклигин билдиреди. Бу назмуланы окъусанг, таза джюрекден джазылгъанларына ишексиз боласа. Къарачайны тамам джюреги бла сюйюб, табигъатны ариулугъун, миллетини ашхы шартларын алада кëргюзеди. Назмула бла къалмайын, Акъбайланы Азрет джыргъа да уста болгъанды, поэмала да, балладала да джазгъанды. «Джазыуну толкъунлары» деген поэмасында Ата джурт къазауат башланнганлай, кесини джашауу къалай тюрленнгенини юсюнден джазады. «Къарачай атны юсюнден баллада» деген чыгъармасында къарачай атны ариулугъу бла, тëзюмлюгю бла эмда тирилиги бла ëхтемленеди. Атны чабханын къушну учханы бла, туякъларын къаты таш бла тенглешдиреди. Акъбайланы Азретни сëз байлыгъы, кесини сезимлерин ариу ачыкълай билгени, чемерлиги сейирсиндиреди. Ëсюб келген джаш тëлю Акъбайланы Азретча джазыучуларыбызны чыгъармаларына эс бëлюрге, андан юлгю алыб, Ата джуртларын сюерге керекдиле. Аны бла байламлы Акъбайланы Азретни «Тилейме, сыйлы Аллахым» деген назмусундан талай тизгинни эсигизге салыргъа излейме:
Сенден, Сыйлы Аллахым,
Кëбдю тилегим.
Бу тынгысыз дуниягъа
Ауруйд джюрегим.
Адам – инсан – эс джыйыб,
Ариу джашары,
Бир-бирин тюл, гырджынын
Халал ашары
Келирча эт, Сыйлы Аллах,
Кючюнг – къыйырсыз...
Къалгъандыла бек кëбле
Адебсиз, сырсыз.
Адам бала дуниягъа
Насыбха келсин,
Мамырлыкъда, тюз джашаб,
Къартлыкъгъа джетсин...
Аджиланы Разима.




