Бу кюнледе РФ-ны экономика ёсюмюню министрини орунбасары Сергей Назаров ишни юсю бла Къарачай-Черкесиягъа келген эди.
Архыз посёлокда Сергей Назаров «Архыз» турист-рекреация комплексни айнытыуну хакъындан ишчи къауумну кенгешин бардыргъанды. Ол кенгешге КъЧР-ни Правительствосуну Председатели Мурат Аргунов, КъЧР-ни Халкъ Джыйылыууну (Парламентини) Председатели Александр Иванов, федерал департаментлени, ведомстволаны келечилери, республиканы
Правительствосуну къуллукъчулары къошулгъандыла.
Кенгешде сёз курортну айнытыуну юсюнден баргъанды. Быйыл байрым (февраль) айда вице-премьер Александр Новак бардыргъан кенгешни кёзюуюнде берилген буйрукъла къалай толтурулгъанлары бла байламлы докладла этилгендиле.
Артыкъсыз да, КъЧР-ни Правительствосуну къуллукъчулары бла «Газпром» ПАО-ну, «Россети» ПАО-ну келечилери курортну электрокъууат, газ, суу бла баджарыуну юсюнден толу хапар айтхандыла.
Сергей Назаров, биригиб ишлеуню магъанасын черте, хар проект белгиленнген болджалгъа толтурулургъа кереклисин айтханды.
Ызы бла «Мантера-Групп» ООО бла «Архыз» УК-ны келечилери курортну джеринде инвесторла резидент проектлени къалай толтургъанларыны юсюнден отчёт этгендиле.
Кенгешге къошулгъанла, адамланы суу къобхандан сакълар ючюн, Архыз сууда бедженлени къурулушуну проектин, Архызны тышы бла баргъан джолну проект-смета къагъытларын да сюзгендиле.
КъЧР-ни Премьер-министри Мурат Аргунов айтхандан, Архыз курортха ёсюм алдырыу магъаналы проектди, алай бла джангы иш орунла да къураллыкъдыла. Республикада инвесторлагъа таблыкъла къураугъа аталгъан ишле да бардырыладыла.
Сергей Назаров Архызда инженер инфраструктура къалай джарашдырылгъанына да къарагъанды.




