КъЧР-ни Башчысы Темрезланы Рашид Черкесск шахарны 20-чы номерли школунда Билимни кюнюне аталгъан къууанч джыйылыугъа къошулгъанды.


Джыйылыуну кёзюуюнде школгъа Социалист Урунууну Джигити, СССР-ни махтаулу химиги, Ленинни ордени бла эки кере саугъаланнган, Черкесск шахарны сыйлы адамы Захар Цахиловну аты аталгъанды. Республикан аралыкъны шимал микрорайонунда орамланы бири да Захар Цахиловну атын джюрютюб башлагъанды. Бу иш Черкесск шахарны 200-джыллыгъына аталыб бардырылгъанды.
Къууанч джыйылыугъа къошулгъанланы арасында КъЧР-ни окъуу бла илму министри Инна Кравченко, Черкесск шахарны мэри Алексей Баскаев, Захар Цахиловну джууукълары, школну устазлары бла сохталары, атала-
анала бар эдиле.
Республиканы Баш-чысы Темрезланы Рашид сохталаны, аталаны-аналаны джангы окъуу джыл башланнганы бла алгъыш-
лагъанды. Темрез улу белгили джердешибиз Ата джуртха къуллукъ этиуню юлгюсю болгъанын, аны аты школгъа аталгъаны ашхы иш болгъанын чертгенди.
«Захар Цахилов Черкесскеде алчы предприятиелени бирине 50 джылдан артыкъны башчылыкъ этгенди. Шахарны ёсюмюне къошхан юлюшюне багъа берген да къыйынды. Аны башламчылыгъы бла медсанчасть, санаторий-профилакторий, профтехучилище, сабий садла, фатарла дагъыда башха социал магъаналы объектле ишленнгендиле. Ол ишин уста билген, джууаблы, халал джюрекли адам эди. Джердешлерини, биргесине ишлегенлени арасында Захар Сосланбековични сыйы уллу эди.
Багъалы сохтала, быллай адамланы юслеринден окъугъуз, билигиз, атларын эсигизде тутугъуз. Нек десегиз, ашхы ишлери бла республикабызны атын махтау бла айтдыргъан адамланы атлары унутулмай, энди келлик тёлюле да билирча этерге тыйыншлыды. Захар Цахиловну юлгюсю сизни игиликлеге, туугъан джуртха халал къуллукъ этиуге учундурсун», – дегенди Темрезланы Рашид.

Джыйылыуда Захар Цахиловну къызы Марина Уртаева да сёлешгенди. Ол, атасын эсге тюшюре: «Мени атам саулай джашауун химия промышленностха атагъанды. 55 джылдан аслам заманны бу шахарда «Черкесское ордена Трудового Красного Знамени химическое производственное объединение» АО-гъа башчылыкъ этгенди. Ол къралыбызда эм уллу химия предприятиелени бири эди. Башчылыкъ эте билген, ишине тамам кёлю бла берилген адам эди. Атам, къуру республикагъа тюл, бютеу къралыбызгъа да ёсюм алдырыргъа тырмаша эди. Кёб тюрлю кърал саугъаны иеси эди, Джуртун, республикасын да бек сюе эди», – дегенди.
Джыйылгъан джамагъатны аллында РФ-ны билим бериуюню сыйлы къуллукъчусу, КъЧР-ни махтаулу устазы Сармадан Папшуова да сёлешгенди. Ол чертгенден, белгили джердешибиз Захар Цахиловну аты республиканы тышында да кенг белгилиди, ол Къарачай-Черкесияны ёсюмюне тыйыншлы юлюш къошханды.
Ызы бла школну арбазында, адетдеча, биринчи къонгурау къагъылгъанды. Къонгурауну къагъаргъа 11-чи «Б» классны сохтасы Ростислав Пономарев бла 1-чи «А» классны сохтасы Абазалыланы Амирагъа эркинлик берилгенди.
Андан сора КъЧР-ни Башчысы Темрезланы Рашид бла Марина Уртаева школгъа кирген джерде Захар Цахиловгъа аталыб салыннган мемориал къа-
нганы ачхандыла.
Джыйылыуну ахырында Темрезланы Рашид школну окъуу кабинетлерине, спорт залына, хант бёлмесине къара-
гъанды, сабийлени хунерлик ишлери бла шагъырей болгъанды.
Аны бла да къалмай, КъЧР-ни Башчысы Темрезланы Рашид, Черкесск шахарны 200-джыллыгъы бла Къарачай-Черкесияны кюнюн белги-
леуге атаб, Къарачай-Черкесияны аллында джетишимлери, кёб джылланы айыбсыз уруннганы, промышленностну ёсюмюне уллу юлюш къошханы ючюн, Социалист Урунууну Джигити Захар Цахиловгъа (ёлгенинден сора) «Почётный житель Карачаево-Черкесской Республики» деген атны ата-
гъанды.
Темрезланы Рашид кърал саугъаны Захар Цахиловну къызы Марина Уртаевагъа бергенди.

 
{jcomments}