Къыркъаууз айны 6-да, 7-де Черкесск шахарны 200-джыллыгъын белгилеу бла байламлы, 14-де да Эресей Федерацияда сайлаула бардырыу бла байламлы магъаналы ишлени тынчлыкълы ётдюрюр муратда, Къарачай-Черкесияны Башчысы Темрезланы Рашид Терроризмге къаршчы кюрешни хакъындан республикан комиссия бла оператив штабны кенгешин бардыргъанды.
Темрез улу сайлаула бла джарыкълыкъ ишлени кёзюулеринде джамагъатны къоркъуусузлугъун сакълау эм баш борчубуз болургъа керекди деген оюмун айтханды.
Башчы джыйылгъанланы мындан ары Терроризмге къаршчы кюрешни хакъындан республикан комиссиягъа башчылыкъ этерик Семенланы Марат бла да танышдыргъанды.
Андан сора, кенгешге къошулгъанла къоркъуусузлукъну бегитиуге, джорукъну сакълаугъа джууаблы органланы арасында байламлылыкъны къысха этер мадарланы сюзгендиле.
Ала Эресейде, ауаз бериб, терроризмге кёллендиргенлени тыяр умут бла бардырылгъан профилактика ишлени табыракъ къурауну юсюнден да сёлешгендиле.
Темрезланы Рашид сыйлы къартларыбыз, сёзлери ётген онглу адамларыбыз, дин башчыла джаш тёлю бла ачыкъ ушакъла эте турсала, джорукъ сакълаучу органла да профилактика ишлерин тири бардырсала, бу иш алгъа барлыгъын чертгенди.
Кенгешни ахырында кърал къуллукъчуланы хар бири неге джууаблы болгъаны белгиленнгенди. Ала бары да бу магъаналы ишле тамамланнгынчы къадалыб ишлерикдиле.




