Къарачай-Черкес кърал университетде къыркъар (август) айны 28-де, 29-да «Единство Российской нации – гарантия национальной безопасности России» деген ат бла регионла арасы форум бардырылгъанды.

Анга властны, джамагъатны онглу экспертлери, кърал органланы, учреждениелени, джамагъат бирлешликлени къуллукъчулары, миллетле арасы бирикмеклик, къоркъуусузлукъ бегиб турурун излеген башха адамла къошулгъандыла.
КъЧКъУ-да бардырылгъан форумгъа къошулургъа Эресей Федерацияны субъектлеринден кёб адам келгенди.
Форумну Къарачай-Черкес Республиканы Миллет ишлерини кёбчюлюк коммуникациялары бла басмасыны хакъындан министерствосу, Къарачай-Черкес кърал университет, Миллет ишлени федерал агентствосу къурагъандыла. Ала сынам алмашдырырча, миллет къоркъуусузлукъну бегитиу бла байламлы джарсыуланы оноуларын этерча, миллетле арасы шохлукъну, къарнашлыкъны бегитирча, халкъланы маданият байлыкъларын сакъларгъа итиндирирча болум къурагъан эдиле.
Бусагъат заманда бек керекли, аллай магъаналы темагъа аталыб этилген бу иш, усталаны, политиклени, тинтиучюлени бирикдириб, уллу Эресей къралыбыз бегиб туруруна, къралда, джамагъатда тынчлыкъ, рахатлыкъ, бирикмеклик, шохлукъ орун алыб турлугъуна себеблик этериги хакъды.
Алайгъа Эресейни тюрлю-тюрлю регионларындан келген экспертле, властны регионал органларыны, илмуну, джамагъат, дин организацияланы къуллукъчулары, бир-бири бла ушакъ эте, таныша, джангы нёгерле къурай, пленар сессияда, секциялада ишни магъаналы бардырыргъа хазыр-
ланнган эдиле.
Пленар кенгешде, Къарачай-Черкес кърал университетни ректоруну борчларын кёзюулю толтургъан Чанкаланы Мурат джыйылгъанлагъа – властны федерал, регионал органларыны къуллукъчуларына, илму интеллигенцияны, басманы, джамагъат эмда дин организацияланы къуллукъчуларына – хошкелди сёзюн айтды, форумну терен магъанасы болгъанын чертиб, эресейчи миллетлени бирикмекликлери къралыбызны къоркъуусузлугъун бегитгенин, аны ёсюмюне тири джюрюш бергенин билдирди.
Къарачай-Черкес Республиканы Правительствосуну атындан КъЧР-ни Правительствосуну тамадасыны орунбасары Сюйюнчланы Мурат сёлешди. Бизни кърал рахат джашау къураб, социал-экномиканы ёсюмюнде алгъа таукел баргъанын, Къарачай-Черкес кърал университет, илму, окъуу аралыкъча, джаш тёлюню ариу халиге юретирге, джуртха кертиликге, адамланы арасында шохлукъ бегитирге излеб, кёб иш бардыргъанын чертгенди.
Къарачай-Черкес Республиканы миллет ишлерини, кёбчюлюк коммуникациялары бла басмасыны хакъындан министри Есенеев Мурат Мухарбиевич кесини сёзюнде бу форум шохлукъну, джарашыулукъну тамалын салгъанын айтханды.
«Эресей Федерацияны Президенти Владимир Путин бардыргъан, таб, тюз политиканы тамалында бизде миллетлени, регионланы, динлени арасында бирикмеклик, ангыламакълыкъ, шохлукъ бегигенлей барады. Аны эсге алмай къояргъа болмайды. Биз анга уллу багъа беребиз. Ол бизни мийик джетишимибизди. Бусагъат джашауда, миллет къоркъуусузлукъну бегитиуню, халкъланы биригиуюню уллу магъанасы болгъан сагъатда, бу форум Эресейни халкъларын бирикдиреди, къралыбызда мамырлыкъ, рахатлыкъ бегирине, аны ёсюмюне энчи юлюш къошады», – дегенди Мурат Есенеев.
Министр, заман табыб алайгъа джыйылгъанланы алгъышлаб, ала, бардырылгъан форумну тамалында хайырлы ишле этериклерин чертгенди, Къарачай-Черкес кърал университетни башчылыгъына, адамланы бирикдирген, игиликге учундургъан, арада шохлукъ бегитген быллай аламат плошадка къурагъанлары ючюн, разылыгъын билдириб, бюсюреу этгенди.
Терк Башы Тегей Республиканы миллет политика бла тыш байламлылыкъдан министри Кумаллагов Олег Андреевич, Къабарты-Малкъар Республиканы миллет ишледен эмда джамагъат проектледен министри Курашинов Анзор Владимирович, Къарачай-Черкесияны муфтийини орунбасары Ёзденланы Али хаджи дагъыда башхала джыйылыугъа келгенлеге алгъыш сёз айтхандыла. Ала Эресейни тарихини, ол кёб халкъланы, аланы культураларын, башха ашхы затларын бирикдиргенини, арада шохлукъну къурч кёпюрлерин бегитиб, рахат, мелхум джашау къурагъаныны, тин, иннет байлыгъыны юсюнден сёлешгендиле.
Пленар кенгешни тамалында Джамагъат оюмну тинтген фондну баш директору, «Неравнодушный человек» деген социал платформаны Къараучу фондуну тамадасы, Эресей Федерацияны Урунуу бла социал джакълыкъны министерствосунда Джамагъат советни тамадасы Абрамов Константин Валерьевич, тарих илмуланы кандидаты Къралла арасы тинтиу институтну онглу илму къуллукъчусу, Москвадагъы кърал институтну Эресейни тыш къралла бла байламлылыкъ джюрютген кафедрасыны доценти Маркедонов Сергей Мирославович, Къабарты-Малкъар Республиканы миллет ишлеринден эмда джамагъат проектлеринден министри Курашинов Анзор Владимирович, Ингушетияны тыш байламлылыкъдан, миллет политикадан, басмадан эмда информациядан министри Мизиев Руслан Илезович, Шимал Кавказ Федерал округда Миллет ишлени хакъындан федерал агентствону регионла арасы управлениесини кърал миллет политикадан бёлюмюню тамадасы Лукьянов Сергей Анатольевич, Чечен Республиканы миллет политикадан, тыш байламлылыкъдан, басмадан эмда информациядан министрини орунбасары Абдулвагапов Джабраил Ахматович, Москвада къралла арасы тинтиу институтну илму къуллукъчусу, тарих илмуланы кандидаты Ярлыкапов Ахмед Аминович, Къарачай-Черкес кърал университетни Эресейни тарихинден кафедрасыны тамадасы, тарих илмуланы доктору, профессор Бегеулланы Рустам аналитика эмда эресейчи миллетлени бирикдириуге, бурундан келген тюз тин-иннет байлыкъны багъалатыугъа, миллет къоркъуусузлукъну сакъларгъа аталгъан докладла этгендиле. Аланы хар бирине залдан соруула сорулуб, алагъа джууабла берилиб, сюзюлген ишлени оноулары этилиб баргъандыла.
Пленар кенгешни ишин политика илмуланы кандидаты, ректоратда кенгешчи Ёзденланы Таусолтан бардыргъанды, ол, адамланы ачыкъ ушакъгъа чакъыра, ишни таб къурагъанды.
Бир кесек солугъандан сора джыйылгъанла, 3 секциягъа юлешиниб, ишни андан ары бардыргъандыла.
Биринчи секцияны «Исторические основы национального единства народов России и формирование сильной государственности» деген ат бла Бегеулланы Рустам бардыргъанды.
Экинчи секцияны «Культурно-исторический код России: сохранение наследия, традиционных ценностей и этнокультурного многообразия как основа национальной безопасности и суверенитета» деген тема бла, тарих илмуланы доктору, профессор, Махачкаладан Тарих, археология эмда этнография институтну белгили илму къуллукъчусу Руслан Ибрагимович Сефербеков бла КъЧКъУ-ну тарих кафедрасыны тамадасы, тарих илмуланы кандидаты, доцент Текеланы Лариса, Кичини къызы бардыргъандыла.
Ючюнчю секцияны «Формирование общероссийской гражданской индентичности в молодёжной среде: единство патриотического воспитания, межнационального согласия и информационной безопасности» деген темагъа Ставрополдан Шимал Кавказ федерал университетде Эресейни тарихини кафедрасыны тамадасы, гуманитар институтну директору, тарих илмуланы доктору, профессор Айдынланы Диана, Хаджи-Муратны къызы бардыргъанды.
Докладла бла ушакъла джаш тёлюню гражданлыкъ сезимге, патриотлукъгъа юретиуню джангы мадарларына аталыб болгъандыла, джаш тёлюню социал эмда культура ишлеге тири тартыргъа кереклиси айтылгъанды.

Лепшокъланы Хусеин.

 
{jcomments}