Спорт бла кюрешген джаш тёлюбюз миллетибизни, республикабызны да атын айтдырыр ючюн къалмайдыла.
Бу кюнледе энтда аллай бир спортчубузну юсюнден иги хапар эшитиб, къууандыкъ – джыллары 18-ден ёрге болмагъан джашла бла къызланы арасында дзюдодан дунияда биринчиликни алыр ючюн баргъан эришиуледе Алийланы Айшат деген таулу къызчыкъ алтын медаль алгъанды. Болгарияда болгъан ол уллу эришиулеге 71 къралдан 550-ден
аслам адам къошулгъанды.
Эришиуледе Айшат ауурлукълары 63 килограммдан кёб болмагъан беш адам бла эришген-
ди (беш поединогу болгъанды). Ала бары да дзюдону керти усталары болгъанлыкъгъа, Айшат, барын да хорлаб, аладан да уста болгъанын танытханды. Европаны алчылыгъы ючюн баргъан эришиуледе да ол халда хорлаб, биринчиге чыкъгъан эди. Эришиулеге ол Тюмен областны атындан барады. Алай а къайсы регионну атындан барса да, ол Къарачай-Черкесияны, къарачай миллетни атын айтдырады. Машалла Айшат эгечибизге! Уллу спорт хорлам бла аны алгъышлай, кючлю саулукъ, андан да уллу джетишимле теджейбиз!
(Бизни корр.).




