Багъалы джердешлерибиз!
Сизни барыгъызны да таза джюрекден алгъышлайбыз Къарачай-Черкес Республиканы кюню эмда Черкесск шахарны 200-джыллыгъы бла.

Республиканы кюню мында джашагъан халкъланы бирлигини, келишиулюгюню, Эресейни къурамында къраллыгъыбызны белгисини кюнюдю. Бизни республикада тюрлю-тюрлю миллетлени келечилери джашайдыла. Аланы арасында шохлукъ ёмюрледен бери джюрюйдю. Хар миллетни кесини энчи культурасы, энчи адетлери бардыла да, ала, барыбызны да бир юйдегини адамларынча, бирикдиргендиле. Барыбыз да, биригиб ишлей, республиканы эмда ара шахарыбыз Черкесскени ёсюмюне, джашнауууна уллу юлюш къошуб келебиз.
Артыкъ да бизни барыбызны да Черкесск шахарны юбилейи бек къууандырады. Шахарны бу байрамын биз Эресейни Президенти Владимир Владимирович Путинни буйругъу бла белгилейбиз. Эки ёмюр аз заман тюлдю. Ма ол заманны ичинде бир тёлю бир тёлюню ауушдура, ара шахарыбыз Черкесскени джашнатыр иннетде джигер урунуб, махтаулу болур ючюн къалмагъандыла. Алай уллу болмагъан ара шахарыбыз, административ, экономика, культура джаны бла уллу ёсюм алыб, бюгюнлюкде регионланы ара шахарларына юлгюлю болгъанды. Бек узун, алай а сыйлы, махтаулу джолну ётгенди ол.
Мындан алда Уллу Хорланны 80-джыллыгъын байрамлагъан эдик да, энди бюгюн Черкесск шахарны 200-джыллыгъын байрамлайбыз. Бу юбилей барыбызгъа да уллу байрамды. Уллу Хорламны 80-джыллыгъыны байрамча багъалыды. Уллу Ата джурт къазауатны джылларында совет аскерчиле кеслерини Уллу джуртларын джакълагъанча, ара шахарыбыз Черкесскени душмандан джакълаб, джигитлик кёргюзюр ючюн къалмагъандыла. Аланы эмда совет халкъны джигитлиги бла азатланыб, мамыр джашаугъа кёчюб, онла бла джылланы ичинде уллу ёсюм алгъанды. Сый, махтау болсун, бютеу республиканы джакълагъанча, ара шахарыбыз Черкесскени да душмандан джакълаб, ётгюрлюк танытхан джигитлерибизге! Биз ма ол джигитлени алларында не заманда да борчлубуз. Ала бизни махтаулу джердешлерибиздиле. Бюгюн-бюгече да биз барыбыз да аладан юлгю алыб турабыз. Ол адамланы атлары алтын харифле бла джазылгъандыла республиканы тарихинде.
Бюгюнлюкде аскер къаугъа барады Украинада. Уллу Ата джурт къазауатны джылларындача, бюгюннгю тёлю, озгъан къазауатны ветеранларындан юлгю ала, энчи аскер операцияны бардырыуда джигитлик кёргюзюр ючюн къалмайды. Биз – республиканы джамагъаты – Уллу Ата джурт къазауатны ветеранларынача, бюгюнлюкде Украинада баргъан аскер къаугъаны джигитлерине махтау бериб, ала бла ёхтемленебиз.
Бюгюнлюкде Къарачай-Черкес Республика эмда аны ара шахары Черкесск, Эресейни Президенти Владимир Владимирович Путинни эс бёлюую бла, болушлугъу бла ёсюмню джолу бла бара, тюрлю-тюрлю объектлени ишлей, республиканы джамагъатыны джашауун игилендириуге уллу эс бёлюнеди. Бизни барыбызны да бир борчубуз барды: Гитче джуртубузну эмда бютеулей да Ата джуртубузну джашнатыр ючюн урунууда, башха санагъатлада фахмубузну, кючюбюзню аямазгъа керекбиз. Ма ол заманда биз, муратыбызгъа джетиб, дунияны башында эм алчы къралланы бири боллугъубузгъа сёз джокъду.
Багъалы джердешлерибиз! Байрам байрамды. Анга биз барыбыз да къууанч халда тюберге тыйыншлыбыз. Сизни барыгъызгъа да уллу саулукъ теджейбиз. Хар биригизни юйдегигизде рахатлыкъ орналыб турсун. Джаныбызча багъалы Къарачай-Черкес Республика, аны биз барыбыз да сюйген ара шахары Черкесскени джолу узун, къууанчлы болсун!

Къарачай-Черкес Республиканы Башчысы
ТЕМРЕЗЛАНЫ Рашид

Къарачай-Черкес Республиканы Халкъ
Джыйылыууну (Парламентини)
Председатели

ИВАНОВ Александр
Къарачай-Черкес Республиканы
Правительствосуну Председатели
АРГУНОВ Мурат.

 
{jcomments}